Remarcable den e corespondencia di e siman aki tabata un carta cu gerencia di Setar NV a manda pa e mandatario responsable pa sector di Telecomunicacion, cu e propuesta pa un forma alternativo pa gobierno yega na un suma equivalente na loke ta anticipa cu e empresa lo a entrega, den cuadro di e recorte obligatorio di 12,6%, acorda cu gobierno Hulandes.

Mientras no ta conoci cu e mandatario a reacciona positivo riba e propuesta, ta parce cu gerencia di Setar a pasa caba pa paga full salario entrante e aña aki. Esey so caba ta pone henter e discusion tocante e recorte di 12,6% back den centro di debate, lantando discusion den e demas entidadnan estatal cu mester cumpli cu e acuerdo entre e gobiernonan. Cierto argumento di e sindicatonan ta bolbe den e carta aki tambe, unda cu Setar NV tambe ta referi na e hecho, segun nan, cu a pone placa riba cuenta pa Fase, explicitamente. Y cu e acierdo tabata e contribucion como solidaridad cu e personanan cu a keda desemplea. Awor cu a termina e areglo di asistencia di emergencia, igualmente e subsidio riba salario, e empresa aparentemente tampoco ta mira necesidad pa continua cu e recorte. Sin embargo, ta cumpli y ta bin cu e dos prouestanan di cual uno Setar mes ta descarta. Esun cu ta keda ta bisa cu a economiza asina hopi a base di e plan di retiro di fin di 2020 cu den e proximo añanan por percura pa un dividend (extra) pa Pais Aruba, pa asina haya di otro forma e suma cu gobierno tabata spera pa reduci su deficit y e necesidad di bay fia mas. Y asina gobierno lo ta cumpliendo cu e acuerdo cu Hulanda tambe. En todo caso, esey por ta asina pasobra e secretario di estado durante su recien bishita a duna di conoce cu ta posible pa papia con ta yega na e 12,6%, contal cu e decision ta keda cu ta corta 12,6%.

Sin embargo, esaki no ta henter e asunto. Basicamente e empresa estatal ta pensa cu na 2022, y e añanan despues, por haci ganashi di tal indole cu por paga Pais Aruba, como unico accionista, un dividend extra di 3 miyon florin, e suma necesario pa gobierno y Setar cumpli cu e 12,6% anto. E demas ganashi ta ser usa pa compensa e perdida sufri na 2020, y cu a compensa for di e reserva di ganashi cu e compania tin. Asina e compania por ‘boost’ su reservanan di ganashi pa pone nan back unda nan tabata promer cu e pandemia, solamente cu ta haci esaki na un paso mas lento den proximo añanan, mirando cu mester duna gobierno e 3 miyon florin 2022 pa cumpli cu e acuerdo cu Hulanda.

Cu otro palabra, ta bay tarda mas pa pone e empresa back na nivel di solvencia unda e kier/mester ta, mientras den e carta mes ta bisa cu e situacion actual por haci cu e banconan lo ta menos dispuesto pa fia. Y, Setar mes no ta keda sin menciona e inversionnan grandi cu mester haya prioridad den e proximo añanan. Pues aki e empresa mes ta bisa cu ta acepta un situacion menos faborable di solvencia financiero, pa acomoda e necesidad di cash di e accionista unico (Pais Aruba). Y, mas importante ainda: ta e gerencia ta propone, pero ta e accionista ta dicidi cuanto e ta duna su mes, cu e obligacion di maneho adecua di no saca tanto dividend for di e compania cu ta pone su solvencia na riesgo. Finalmente, ken ta dicidi si Setar por paga 100% di salario e aña aki, ta e mandatario encarga. Nos no sa si el a hacie caba; nos sa si cu e empresa a paga luna pasa caba 100%, cu of sin aprobacion. Bottom line aki: ta aboli e recorte mientras gerencia y accionista ta prefera di entrega dividend envez di sigura estabilidad financiero di e empresa? Anto esey ta den e caso cu aña 2022 resulta faborable. Si cos mester bay malo, y e situacion inestable internacional actual por hiba nos den un rumbo bastante negativo, ta bay pidi e empleadonan pa entrega atrobe, e biaha aki pa scapa pellejo di e empresa mes?

Seguidamente nos ta haya e situacion den e otro entidadnan. Nos no sa di e situacion financiero di mayoria, pasobra e gobierno cu ta propaga na cualkier momento di dia o nochi nan version di transparencia, te awe no ta duna acceso publico na mayoria di e cuentanan anual di e entidadnan cu supuestamente ta di pueblo (Setar mes cu su lema: “Di nos e ta!”). Pues nos no sa, pero ta logico cu ta inventa un formula pa maneha e exigencia di 12,6% pa cada entidad segun nan situacion. Esunnan cu en todo caso no tin caminda di sconde ta e empleadonan di gobierno mes. Pa nan lo no tin ideanan inventivo y creativo pa yega na e recorte na un manera aceptable pa nan. Mientras ta wardando riba e veredicto den e caso entre gobierno y e sindicatonan, lo mira areglonan surgi pa e empresanan estatal cu finalmente por laga e sindicatonan di empleado publico y personal di enseñanza para nan so den nan lucha. E strategia di ‘dividi y domina’ por funciona y gobierno por logra apacigua e situacion na e empresanan clave.