Durante un conferencia di prensa cu a tuma luga ayera mainta, Minister di Transporte, Integridad, Naturalesa y Asuntonan di Adulto Mayor, Ursell Arends, a anuncia e lansamento di e liña di telefon 125 specialmente pa brinda servicio na e adultonan mayor.

‘Mi ta inclui’ ta e slogan pa loke ta trata e liña di telefon 125, pa asina e adultonan mayor tambe por sinti nan mes inclui. E liña di telefon aki lo contribui tambe na un sociedad mas inclusivo pa e adultonan mayor.

Minister Arends a indica cu e aña aki na Aruba, tin mas di 25 mil habitante cu ta riba 60 aña di edad. Esaki ta ekivalente na 24% di Aruba su poblacion y pa 2026 tur e cifranan ta indica cu e grupo aki lo crece y bira 30% di e poblacion.

“Haciendo esaki ta duna e grupo aki e servicio accesibel cu nan merece y p’esey mes constantemente evalua si nos ta logrando nos metanan pa mi ta sumamente importante,” el a remarca.

E liña di telefon 125 ta wordo lansa den colaboracion cu Club Kibrahacha 60+ y pa algun tempo caba, e Ministerio di Asuntonan di Adulto Mayor, hunto cu Club Kibrahacha 60+ ta trahando riba e proyecto aki. E meta di e liña di telefon 125 ta pa yuda combati tanto soledad y isolacion cu ta biba bao di e adultonan mayor.

Minister Arends a splica cu durante e periodo di COVID-19, Club Kibrahacha ya caba tabata dirigi e liña di telefon aki pa atende cu e adultonan mayor cu tabata den isolacion. Esey a stop un tempo y aworaki a reactiva e liña aki pa brinda e servicio na tur adulto mayor y alabes yuda nan sinti mas inclui den comunidad.

Bon Dia Aruba a puntra e minister si tin un motibo pakico e servicio a stop un tempo despues di pandemia. El a splica den su contesta cu aworaki for di Kibrahacha nan a zorg pa haci esaki den un plan di maneho y Directie Ouderen Zaken mester a aloca e fondonan necesario pa por haci esaki y a bin cu e liña di telefon cu ta completamente gratis.

El a agrega cu e proyecto a cana su trayectorio pa haci esaki uno cu no t’ey solamente bao di cierto minister, pero cu por bira un proyecto cu lo t’ey pa semper y garantisa cu e adultonan mayor por haya e servicio accesibel.

Minister Arends a subraya cu e liña di telefon aki ta cuadra cu dos punto di e vision cu e Ministerio di Asuntonan di Adultonan Mayor tin. E prome punto ta crea y ofrece e servicio di cuido adapta pa e adultonan mayor, y e di dos punto ta brinda un servicio mas accesibel, servicio, na unda e adultonan mayor ta sinti mas inclui.

El a sigui splica cu durante e prome seis lunanan, e liña di telefon 125 ta bay ta disponibel for di 8:30 di mainta pa 12:30 di merdia, cinco dia pa siman. Despues di seis luna, ta bay evalua si lo sigui cu e mesun orario di disponibilidad of si mester ahusta esaki.

“Mi ta contento di por ta para aki pa e lansamento di nos telefon 125, un liña di telefon gratis pa adultonan mayor. E ta un trayecto basta largo cu nos a core pa por yega te na e momento aki cu nos ta para akinan y entrante mañan hendenan por cuminsa yama nos,” Sra. Lenny Geervleit di Club Kibrahacha 60+ a bisa.

Sra. Geervliet a splica cu durante e ultimo dos añanan, manera minister a indica, for di e periodo di COVID-19 nan a cuminsa ripara cu e adultonan mayor mester a keda cas y no por a bin Kibrahacha mas.

For di parti di gobierno y Bureau Rampenbestrijding (BRA), el a sigui splica cu a lanta un liña di telefon gratis na unda e adultonan mayor por a yama. “Nos a ripara cu tin necesidad eyfo pa e adultonan mayor por tin contact cu un hende, un profesional cu ta getrained pa contesta telefon y yuda e adultonan,” el a agrega.

El a conta cu e adultonan mayor cu tabata haci uso di e servicio tabatin diferente problema, entre otro ayudo cu dokter, ayudo cu cuminda y transport. El a enfatisa cu tur esey a habri nan wowo y e plan ‘mi ta inclui’ kier inclui e adultonan mayor den comunidad.

El a remarca cu hopi biaha loke ta pasa ta cu inconscientemente, e adultonan ta wordo exclui y esey ta loke nan kier evita. “E meta di e liña 125 ta pa habri caminda pa e hendenan haya un contact y haya e ayudo cu nan tin mester di dje.”

Geervliet ta encarga cu e training di e boluntarionan. Esaki, el a conta, ta consisti di mas o menos cinco encuentro caminda nan ta duna informacion,splica pakico e liña t’ey, kico nan mester bisa y kico nan no mester bisa, kico si nan por haci ora nan ta papiando cu un hende y kico no etc.

El a enfatisa cu via telefon ta un manera completamente diferente di scucha pasobra e persona no por wak e otro persona para y cu ta haci expresionnan cu su man, cu su pia, cu su cabes. Na liña tin stem so y e boluntario mester scucha, esey ta na prome luga.

Si tin persona interesa pa bira boluntario, por yama Club Kibrahacha 60+ duna nomber, adres y number di telefon y e persona encarga lo tuma contacto back pa inscribi pa e curso di con pa bira boluntario. Pronto lo cuminsa cu otro training

Bon Dia Aruba a puntra si tin algun rekisito specifico pa por bira boluntario. Sra. Geevleit a splica cu no tin niun rekisito extraordinario, pero loke nan ta pidi ta cierto nivel di compromiso, un hende madura, un hende cu tin e empatia. No tin exigencia den termino di educacion, pero si hende serio cu por compromete nan mes pa un tempo.