125 morto violento na Hulanda aña pasa; Hende muhe asesina mas tanto pa pareha of ex-pareha

(nltimes.nl) – Aña pasa, 125 hende a muri na Hulanda como resultado di asesinato of homicidio – 84 hombery 41 muhe. Esaki ta 18 victima menos cu un aña anterior, pero ta mas o menos den e promedio di e ultimo diez aña, 129 morto violento pa aña. Durante e periodo ey, mas cu mita di e victimanan muhe tabata asesina pa nan pareha of ex-pareha. CBS di Hulanda a informa cu muchanan casi semper tabata wordo asesina pa un mayor.

E cantidad di victima di asesinato y homicidio na Hulanda a ta bahando pa añas. Na 1996, 171 homber y 69 muhe a wordo asesina violentamente. “Tabatin un caida grandi, principalmente entre homber, te na 2016, cu fluctuacion anual.” Despues di un subida exponencial na 2017, e cantidad di victima homber a stabilisa na un promedio di 84 pa aña. E cantidad di muhenan asesina tambe a disminui, pero menos dramaticamente. Den e ultimo 10 aña, un promedio di 41 muhe a wordo mata pa aña.

Muhenan ta wordo asesina hopi biaha pa nan pareha of ex-pareha. Entre 2014 y 2023, polis a logra identifica un sospechoso den 96% di e casonan di feminicidio. Den 54% di e casonan, e sospechoso tabata e pareha of ex-pareha di e victima. Pa muhenan entre 20 y 60 aña, esey tabata 70%. Alrededor di 20% tabata wordo mata pa un miembro di famia. Muhenan ta wordo asesina hopi biaha den nan propio cas cu un arma di hincamento of pa strangulacion.

Pa e victima homber, polis a logra identifica un sospechoso den 87% di e casonan. Den mas cu 30%, e sospechoso tabata un conoci di e victima. Casi 1 di cada 8 caso tabata relaciona cu un ahuste di cuenta den e mundo criminal. Tres cuarta parti di e victima homber tabata wordo tira of hinca te cu nan morto.

Mucha chikito a ser asesina casi semper pa un di nan mayornan. Entre 2014 y 2023, 61 mucha bou di 10 aña a wordo asesina – 35 mucha homber y 26 mucha muhe. Den 54 caso, un di e mayornan tabata e sospechoso.

Den e ultimo decada, 73% di e victima di asesinato y homicidio tabata entre 20 y 60 aña. Dies porciento tabata menor di 20 aña, y 17% tabata riba 60 aña.

Mita di tur asesinato tabata wordo cometi den municipalidadnan grandi cu mas di 100 mil habitante. Aña pasa, mayoria di e asesinatonan a tuma luga den e tres ciudadnan grandi – Rotterdam (12), Amsterdam (10) y Den Haag (9). Rotterdam tambe tabatin e mayoria di asesinato den 2022.

For di 2019, e cantidad di sospechosonan den casonan di asesinato of homicidio cu eventualmente ta wordo manda corte a keda casi mesun cos. Cada aña, alrededor di 100 sospecho ta wordo culpa pa asesinato of homicidio. Den e ultimo añanan, e porcentahe di casonan di asesinato a disminui. Den 2019, mas cu 70% di e sospechosonan tabata culpa pa asesinato. Den 2023, e tabata menos cu mita pa prome biaha den 20 aña.

E porcentahe di sospechosonan cu ta hende muhe a subi den ultimo añanan. Aña pasa, 10% di e sospechosonan den corte pa asesinato of homicidio tabata hende muhe compara cu 6% den 2019. E promedio di edad di e sospechosonan na momento di e crimen tabata 37 aña.