Den luna di februari e cantidad di turista a baha cu 12,5% compara cu februari aña pasa. Motibo principal segun ATA ta keda e mercado di Venezuela cu ta conoce un caida di 71,3%.

Remarcabel ta cu Aruba Tourism Authority (ATA) tambe ta menciona e ‘manifestacion epidemico di Zika’ como un motibo dicon e cifranan a keda atras. Mientrastanto Departamento di Salud te awor no kier papia di un epidemia oficialmente y sconde dato. Interno y off the record y tambe den e sector medico mes, nan si ta papia caba di un epidemia. Awe mainta e departamento aki ta duna un update di Zika.

Sconde y bruha cifra
Papiando di tapa cifra, Bon Dia Aruba ta ripara cu momento e cifranan di turismo ta bayendo atras e relatonan mensual di ATA no ta duna claridad den titulo y intro di biaha riba e cantidad di turista. Esaki tambe ta e caso cu e luna aki, unda mester bay te na e di cuater alinea pa haya e cifra total di turista na februari. Mientras den pasado ora ainda e turismo tabata crece, e porcentahe aki lo sali di baha y tambe den titulo.
E motibo dicon ATA a cuminsa publica nan cifranan den e forma aki, no ta conoci. Finalmente nos kier a publica e grafieknan cu ATA a manda hunto cu e articulo aki, pero nan ta screenshot di un computer y nan ta mustra bruha tambe. Pa no desinforma nos lectornan, nos a dicidi di laga nan afo.

No ta conoci cuanto e mercadonan individual a haci den e luna di februari como cu ATA a duna cifra di e prome dos luna di e aña aki hunto. Pa cu turista crucero, ta bisa cu na februari 81.574 pasaheronan a drenta Aruba, pero ATA ta skirbi den su relato: ‘cual ta un aumento di 12.1% menos compara cu e mesun luna na 2016’. Dus Bon Dia Aruba no por conclui si ta trata di un aumento of un bahamento.

Cifranan di sector hotelero
Aruba Hotel and Tourism Association (AHATA) tambe a duna nan cifranan pa e luna di februari. E‘Average Daily Rate’ (ADR) a aumenta cu 2,1% compara cu 2016. Esaki den cifra ta US$ 308.11 na 2016 compara cu US$ $315.71 pa 2017. E ganashi pa camber, e asina yama RevPar a aumenta cu 7.8% di US$ 277.53 na 2016 pa US$ 257.38 na 2017. E anochinan ocupa pa camber a aumenta cu 2,5%. Tambe por a nota crecemento den ‘Average Room Occupancy’ cu na februari 2016 tabata 81,3%, a aumenta pa 86,3% den februari 2017 cual ta un aumento di 5%.