(Infobae) – Lamentablemente, october ta un luna fatal pa lidernan social na Colombia, cu un cifra di 12 homicidio di e personanan aki cu ta traha pa nan comunidad y pa defensa di derechonan humano.
E caso mas reciente a tuma luga na Timba, municipio Buenos Aries na departamento di El Cauca unda Adelmo Balanta a wordo asesina.
Segun informacion di Instituto di Estudio pa Desaroyo di Paz (Indepaz) varios homber arma a kita su bida ora e tabata mobilisa den e poblacion aki.
E NGO aki cu ta hiba un registro propio di e morto di lidernan social, a indica cu Balanta tabata miembro di Conseho Comunitario de Cuenca de Rio Cauca y Microcuenca Teta Mazamorrero.
Mientras cu e website di noticianan di El Cauca Periodico Virtual a detaya cu e lider social a wordo confronta cu tironan na e caretera cu ta conecta cu Santander de Quilichao.
“Lamentablemente e señor a muri den e atake, e cual a wordo registra ora e tabata stuur su brommer den e via aki, mientras cu e delincuentenan a huy di e luga”, e medio di comunicacion a conta.
Defensor di Pueblo a rechasa e crimen y a indica cu esaki ta un entidad cu a emiti varios alerta for di basta tempo caba den cual nan tabata adverti riba e peliger cu e poblacion civil ta biba den e departamento aki.
Den un comunicado di prensa, nan a recorda cu simannan pasa otro integrante di Conseho Comunitario de Cuenca de Rio Cauca y Microcuenca Teta Mazamorrero a wordo asesina tambe.
“20 dia pasa a tuma luga e asesinato di e lider social Edison Murillo y su bodyguard na Santander di Quilichao, e tambe tabata miembro di e Conseho Comunitario aki. E hechonan aki ta duna cuenta di e situacion compleho, den materia di derechonan humano, cu ta wordo biba na nort di El Cauca, specialmente e caso di comunidadnan etnico y nan organisacionnan di base”, a informa.
For di e organismo aki a solicita na autoridadnan competente pa cuminsa atende cu un acompañamento efectivo pa e personanan aki cu ta traha pa nan comunidad den e departamento aki y pa preveni crimen den nan contra.
