Ministerio Publico ta informa cu Corte den prome instancia a caba di condena E.A.M.S.(24 aña di edad) pa 12 aña di castigo incondicional di prizon pa asesinato. Fiscal a exigi 14 aña.
Orden di captura
Via peticion di Fiscal di Ministerio Publico, tabata tin orden di captura di e sospechoso Erick Arturo Minguel Junior Schneiders, conoci tambe como Minguel. Naci riba 29 December 1994, biba na Meiveld 33 y/of Piera Plat 54 A Aruba. E sospechoso tabata arma y peligroso. Su detencion a wordo basa riba articulo 2:262 c.q. 2:259 di e wetboek van Strafrecht Aruba, y Art 3 Vuurwapenverordening. E sospechoso a entrega su mes na autoridadnan nuebe dia despues di e sucedido.
Version policial di tiramento Olde Molen
Diadomingo madruga pa 4:28 central di polis ta haya un yamada na unda na prome instante ta bisa cu lo tin tiramento banda di Olde Molen. Ta manda patruya di biaha na e sitio . Na yegada patruya di polis ta topa cu un hende homber drumi abao y cu varios tiro na su curpa riba e parkeerplaats di e club. Di biaha a pidi pa ambulance cu urgencia ya cu e persona no tabata duna señal di bida. Ambulance ta yega na e sitio, pero no por a haci nada mas pa sr. De Palm. Dokter a constata morto pa 5:30 anto fiscal a laga confisca e curpa.
