Awe mainta ta wordo celebra un referendum na oficina di Mediador di Gobierno. E referendum aki a wordo solicita pa sindicato FTA pa representa e trahadonan di Costa Linda.
Mediador di Gobierno, sr. Anselmo Pontilius a declara na Bon Dia Aruba cu FTA a cumpli cu tur e rekisitonan necesario. Despues cu sr. Pontilius a reuni tanto cu sindicato y gerencia di Costa Linda, manera ley di referendum ta prescribi, el a convoca e referendum pa awe for di 8’or te cu 9’or y mey di mainta.
Nan ta casi 113 trahado di Costa Linda resort cu awe ta haci uzo di nan derecho di voto pa busca representacion sindical. Sr. Pontilius a bisa cu di e total di trahadonan aki, e sindicato mester haya e mita plus 1 pa haya e representacion di e trahadonan aki.
Aruparking y WEB
Di otro banda, sindicato STA a pidi pa bin cu un referendum pa e trahadonan di Aruparking.
Sr. Pontilius a laga sa cu e proceso aki a cuminsa caba y oficina di Mediador di Gobierno a publica un aviso. Tin 14 dia normal di trabou caminda otro sindicato lo por expresa nan boluntad di participa.
Na e mesun momento e sindicato STA a pidi pa bin cu un referendum pa un di e departamento di produccion di WEB. Ainda e solicitud pa e referendum aki ta den proceso y otro siman e periodo di 14 dia ta vence. Unabes cu e periodo aki ta caduca, oficina di Mediador di Gobierno mester wak si e sindicato a cumpli cu e rekisitonan cu e referendum ta exigi.
Si nan ta cumpli cabalmente cu tur rekisito otro siman mes nan lo fiha fecha riba dia, ora y luga pa e referendum pa e departamento di produccion di WEB.
Sr. Pontilius a splica cu un rekisito tin di haber cu e cantidad di formulario cu ta debidamente firma pa e trahadonan cu lo desea di participa den un referendum.
“Den todo caso e sindicato mester presenta un 50% mas un porciento di e cantidad di trahadonan cu tin derecho di voto”, el a bisa.
El a trece como ehempel cu si tin 100 trahado cu tin derecho di voto, e sindicato mester presenta 50 mas 1 porciento di e cantidad ey. Esey nan ta verifica fei e lista di e dunado di trabou, si esey ta corecto y si tur empleado ta trahando, e referendum lo por tuma luga.
