Fiscal a pidi 3 aña y mey di prizon contra e polis E.R.B. acusa di viola un ciudadano riba 10 di november 2016. Dia 30 di maart hues lo duna veredicto.
Tambe nan acusa e polis B. di malversa obhetonan: un chin-up y dos klop, den e periodo di prome di januari 2009 te 16 di november 2016. Y di ilegalmente haci doño di 60 bala y un klop.
E sospechoso B. na uniform di polis a duna e victima riba e fecha menciona ordo pa mustra su paspoort y pa subi den auto di polis. Segun fiscal, B. a bisa e señora cu e ta hib’e cera. Sinembargo el a hiba e victima na un luga leu, indicando varios biaha cu e ta un polis y menasa cu arma. Asina el a haci uzo di e desigualdad di poder cu a surgi como resultado di e situacion, segun fiscal.
Defensa
Den su defensa B. ta bisa cu el a bay e adres unda tin prostitutanan y a acerca uno. E polis a puntr’e si e ta disponibel, invit’e pa dal un ronchi y bay tene relacion sexual cu ne. El a haci sex boluntario, segun B. y drop e persona bek. “E no a paga ni tabata tin ningun intencion pa paga pasobra e muhe ni ta di su smaak”, asina su defensa a indica.
Sinembargo e victima no ta un prostituta, segun fiscal. E polis a bin na e cas, exigi pa e lanta para y controla su paspoort. E dama a bisa cu e polis a pidi pa e bin warda pa controla si su papelnan ta na ordo. El a subi patras di auto di polis pero nan no a bay warda. E polis sospechoso a hib’e n a un sitio aleha pa despues forsa e persona pa haci acto sexual y tambe el a viola e victima. Esaki a sosode dia 10 di november, e keho a wordo entrega e siguiente dia.
Otro intento
E caso no ta keda te eynan. Dia 15 di november e polis a bolbe presenta na e mesun cas bou pretexto di controla e paspoort atrobe. E biaha aki di un otro muhe. Pero finalmente husticia a detene e polis.
Daña nomber di KPA
“E polis a crea un situacion di humiliacion, miedo y insulto pa e victima. El a wordo viola pa un polis, un funcionaro cu normalmente bo ta bay cerca di dje pa ayudo y di e manera ey e sospechoso a haci daño na confiansa, bon nomber y integridad di KPA. El a probablemente kere cu e persona no lo entrega keho pasobra e ta un prostituta anto lo tin miedo”, asina e fiscal a trece dilanti den corte.
E ta sigui bisa cu posiblemente tin un ‘modus operandi pasobra el a bolbe dia 15 y na september tambe e tabata eynan’. “Pakico dus e tabata bay cada biaha na e cas specifico aki? El a bisa den interogacion cu ta pasobra e mester controla riba prostitucion ilegal, pero nunca el a traha ni un proces-verbaal of rapport tocante esaki.”
