Segun informacion suministra pa Sabine de Groot di departamento di Asunto Social ta indica cu 11 mil hende a registra caba pa haya e ayudo di tres luna aki pa medio di Fondo di Asistencia Social di Emergencia (FASE). Ademas di un total di 1.500 compania. Pero el a bisa cu pa final di april nan tin aproba 4.000 hende di e total cu a aplica.
El a bisa cu minister di Labor y Asunto Social, Glenbert Croes, a introduci FASE pa brinda asistencia pa esun cu a perde entrada durante e situacion di Covid-19. El a declara cu: “FASE a wordo lanta pa yuda y no pa bisa no.” Pero tin reglanan pa cumpli cune. Entre nan tin un grupo grandi cu ainda no a yena nan registracion manera debe ser of nan no a cumpli cu cierto rekisito exigi pa haya e ayudo aki.
Nan a argumenta cu a pesar cu 11 mil a registra pa e ayudo aki, tin un proceso cu mester cana. El splica cu ora un hende a registra y e ta haya su aprobacion for di team di FASE, e lista di aprobacion ta pasa pa SVb y despues na departamento di Asunto Economico(DAS), caminda nan mester haci nan control tambe. Y unabes cu e instancianan ta controla y aproba, e lista ta bay na departamento di Finanzas, unda nan ta controla atrobe pa despues ehecuta e pago.
El a declara cu tur instancia envolvi ta haci nan maximo esfuerso pa realisa e control mas lihe cu ta posibel pa sigura cu mas lihe posibel mas hende por haya pago na fin di luna.
