11 mil a haya FASE… Pero SVb a nota 3800 so…?

Nos ta na juli 2022 y finalmente a trata e ley di subsidio di emergencia di FASE, cu a surgi mas di dos aña antes caba, na inicio di e crisis di Covid-19. Di e manera aki na un momento bastante laat a cumpli cu un requisito legal cu por y tabata mester a bin hopi mas tempran caba. Pa pone bon cla desde inicio, no ta cuestiona e urgencia pa trece alivio pa e grupo grandi den comunidad cu supuestamente a perde trabao y a keda sin entrada. E critica ta concentra riba e manera con a hiba un administracion deficiente cu necesariamente a conduci na un cantidad – pa nos desconoci – di individuo cu no tabata mester a haya e subsidio aki.

Pero e punto no ta pa keda ripiti cu cos a bay robez, sino con ta siña di esaki pa crea un ‘draaiboek’ adecuado, cu ta garantiza cu den un siguiente caso por actua di manera apropia. Y ta remarcable cu net esey nos no ta haya tende… Di manera cu e sospecho ta surgi cu, mientras a haya e rapport di CAD y di Algemene Rekenkamer, no tin algo planea pa duna continuacion na e trabao haci aki. Si esey keda asina, anto por conclui pa di tantisimo vez no ta haci loke mester haci y esey ta duna contenido na e trabao continuo di mehoracion cu yama ‘goberna’.

Scuchando y lesando tocante e discusion dentro y pafor di parlamento aparentemente no tin un vista ainda riba e avance cu nos mester por mira como pais ordena, unda sigur ta posible pa organiza e tipo di ayudo di emergencia aki di tal manera cu mal uso, abuso o corupcion ta keda reduci na un minimo. Pero…, pa por haci esaki lo mester avanza na promer lugar cu mehoracion di e sistemanan di informacion cu gobernacion tin. Y aki tin hopi cos di drecha.

Pa cuminza cu e caso aki mes, unda e problema central ta di perdida di trabao, lo ta mas facil pa administra tur cos si tin un sistema mas sigur di registracion di persona cu ta den e proceso laboral. Por bisa cu SVb tin un sistema bastante avanza, pero ta un hecho cu hopi hende no ta registra ey. Algun cifra pa ilustra esaki. Na maart 2020, ‘pre-Covid’, SVb tabatin registra 43.185 relacion di trabao. Tabatin 41.553 persona registra cu tabata emplea, semper un poco menos cu relacion di trabao pasobra tin hende registra pa mas cu un job. Despues, na maart 2021 ta yega na e punto mas abao di empleo registra na SVb, cu 39.347 relacion laboral. E diferencia ta anto cu maximamente un grupo di alrededor di 3800 persona tabata esnan afecta pa desempleo, mientras nan tabata registra debidamente. Nos por a tuma nota cu a otorga FASE na un grupo di mas di 11.000 persona… Conclusion: gran mayoria di e beneficiarionan no tabata registra oficialmente como empleado.

Un promer pregunta cu ta surgi ta: con e personanan cu a haya FASE, sin cu nan ta registra na SVb, a duna prueba di tabata emplea? O acaso no tabata necesario pa nan proba cu nan a perde trabao? Si nan a duna prueba di tabata emplea, pero no registra oficialmente, a usa e informacion aki pa mehora trabao di SVb? Ki paso lo a tuma pa inclui e informacion tocante empleo no registra, pa SVb por mehora su sistema, pa por bay tras di e empleadornan cu obviamente no tabata cumpliendo cu ley? No mester lubida cu den sector hotelero so caba un par di mil hende a perde trabao di un dia pa otro, y nan tabata traha pa uitzendbureau o pa contratista sin absolutamente ningun seguridad laboral. Es mas, ora cu economia a cuminza move atrobe, ki garantia realmente tabatin cu no a cuminza emplea hende di e mesun manera abusivo aki, cu e mesun grupo di contratista y doño di uitzendbureau operando na margen di ley?

Realmente nos a spera cu e ministro encarga cu Labor lo a mustra mas vision, atendiendo e problemanan structural di empleo cu a resulta bon cla den e proceso di otorga e ayudo via FASE, cuminzando cu atende e problema grandi cu su propio departamento no tin un database cu registro continuo y mas completo posible di henter e poblacion laboral, loke a haci cu a cuminza traha riba e proyecto di FASE cu un ministerio sin instrumento drechi pa carga un proyecto di e magnitud aki. Y, no pa defende e ministro, esey no ta su culpa so. Pa decadas caba gobiernonan a keda sin duna e departamento concerni e instrumentonan cu nan mester pa haci un trabao adecua, y ademas e propio departamento mes ta parce inconsciente y ignorante di loke nan mes mester pa por haci nan trabao. Ta pesey e departamento pa varios aña caba ta limita su mes na un ridiculo encuesta un biaha pa aña, di cual ta saca un cifra di desempleo, cu na modo di papia un luna despues no ta di confia mas. Esey ta exactamente loke a pasa na maart 2020, unda loke e departamento tabatin a resulta irelevante, y ta e database di SVb tabata e base di informacion confiable, parcialmente, manera nos por a constata.

Nos no a tende ni e mandatario, ni su contrincantenan discuti loke nos a expone aki, y esey ta ilustra e deficiencianan structural di nos sistema politico atrasa.