Personanan di diferente sector a participa den e evento di 1000voz organiza door di Fundacion  dr. Mito Croes (FESCA) y Fundacion Digna Lacle-Herrera den fin di siman den Hilton Resort. Tur e ideanan cu a wordo vocifera den e evento aki lo wordo pasa pa partido AVP cu e intencion pa traha un Programa di Gobernacion cu ta bay campaña cune.

E evento 1000voz ta un forma di democracia bibo pa consulta cu pueblo kico ta e maneho cu nan kier mira wordo hiba riba diferente punto cu ta preocupacionnan den comunidad.

E dos fundacionnan a prepara un grupo di persona cu a traha e diadomingo aki como moderador y un di nan ta ex politico Arondino Croes, kende ta un persona masha conoci den entre otro Santa Cruz, cu ta su bario di origen. Mirando su experencia, el a wordo aserca pa fungi como moderador, cu ta e persona cu ta yuda guia e proceso na mesa momento cu cada tema bini na discusion, sincroniza e ideanan di e causa y solucion di cada un. E temanan tabata: Comunidad; Economia; Salubridad y Sostenibilidad. “Nos a haya un bon idea di kico ta e sentimentonan, kico ta biba den comunidad y kico mester wordo haci den e proximo gobernacion,” el a splica.

Pa e moderador aki, un di e puntonan importante cu e ta haya cu mester wordo discuti riba dje ta hubentud. Hopi biaha, ora cu un hoben caba di studia, e no por integra su mes den loke el a gradua den dje. Esaki ta pasobra hopi biaha loke cu hobennan ta bay studia, no tin asina hopi demanda p’e. Pesey ta importante pa bini cu vakopleiding, cu ta dirigi specificamente riba e demanda, y na final e hoben ta haya un trabou mesora. “E gap aki mi ta haya mester trata di cera y yuda cu e demanda ta wordo yena door di yiunan di tera.”

Un parti di e discusion cu a hala su atencion ta e tema di grandinan cu no tin un ambiente agradabel pa nan biba ora cu nan retira. Tin biaha nan ta bay den un facilidad cu no tur ora tin tur e instrumentonan pa brinda e grandinan e miho ambiente cu nan kier. Esaki ta algo cu mester tene cuenta cune y atende pasobra tin un “vergrijzing” grandi na caminda. E ta haya cu mester ta posibel cu nan ta keda na nan cas, pero mester tin mas instituto cu por brinda servicio na cas mes. “Esaki ta un di e puntonan cu a resalta hopi den e discusionnan.”

Croes a expresa cu 1000voz ta un participacion democratico di apoliticonan cu a trece nan puntonan di preocupacion cu nan kier mira den e proximo añanan y e ta spera cu e 1000voz por yuda dirigi e pais cu nan pensamentonan.

Pa finalisa, el a bisa cu e evento tabata un bon iniciativa pa trece puntonan real di comunidad, unda voz di pueblo ta resona, ta algo cu ta hopi positivo.