E prome hotel cu lo bin na San Nicolas bao cadena di NH Hotels lo ta uno all inclusive di 500 camber. E otro ta for di e grupo di Expedia cu tambe lo bin cu un hotel di 500 camber. E hotelnan lo ta riba mesun liña banda di otro na Seroe Colorado riba un subida na Baby Beach.

Esaki minister di Infrastructura Benny Sevinger a bisa den un entrevista cu Bon Dia Aruba.

Un par di siman pasa e minister a divulga na un otro fuente cu nan ta leu den e proceso pa otorga tereno na dos grupo di inversionista pa construi  hotel. Mas detaye no tabata conoci y nos a purba di biaha pa haya mas informacion for di departamento di DIP. Nan a referi na minister y finalmente ayera nos a logra di haya un cita.

Minister Sevinger ta conta cu ta trata di dos grupo di inversionista Spaño. Esun cu ta mas leu den e proceso pa haya e tereno ta e grupo cu kier bin cu un hotel di e cadena NH. E plan ta cu nan lo construi dos hotel, ambos 250 camber, y locual uno ta solamente pa adulto. E otro grupo ta Expedia cu probablemente kier crea un cadena nobo cual na Aruba lo cuminsa cu e prome hotel, segun e minister. E hotel ta bin banda di NH y tin 500 camber.

Segun sr. Sevinger e desaroyo aki ta cumpli cu e normanan di ROP (Ruimtelijk Ontwikkelings Plan). Nos a puntra minister si el a tende di e comentario di Fundacion Accion Ambiental unda nan a denuncia gobierno pa permiti boramento ilegal na Seroe Colorado (publicacion den Bon Dia Aruba 31 mei). E fundacion tambe ta bisa cu e area tin rikesanan historico y natural bou sub suela manera cuebanan, tunnel di awa, mina di fosfaat y sitionan di indjannan. Nan ta indica cu lo cuminsa un campaña internacional y cana camindanan legal pa para e destruccion di e area.

Minister Sevinger a reacciona cu e no ta di haltura di e denuncia di e fundacion. Sinembargo e ta informa cu berdad a haci investigacion pa wak si e suela por carga e construccion di hotelnan. Momento cu ta constata durante construccion cu mester tin cosnan protegi manera obhetonan arkeologico, cu lo percura pa esakinan wordo protegi, segun e mandatario.

Shete tereno pa desaroyo
E minister tambe ta bisa cu a opta pa parti e tereno den shete ‘plot’. “Desde cu mi por corda,  semper Aruba tabata kier un hotel na San Nicolas. Ora nos a drenta den gobierno, un cadena di hotel a haya full San Nicolas den optie (1,6 miyon m2). Nan no a cumpli cu e optie anto perde esaki. Despues nos a reevalua e diseño anto parti e 1,6 miyon m2 pa diferente otro hotel por establece.” E ora mas o menos 5 hende tabata interesa pa haya un optie riba e tereno pero niun a cumpli cu e rekisitonan y a perde e optie.

Despues e hotel all inclusive Bahia Principe tabata planea pa bin na Seroe Colorado. Sinembargo nan a cancela na ultimo, ora a tende cu e refineria lo habri bek. Y awor e ora tin dos grupo Spaña cu un plan solido pa traha e hotelnan.

Destaho publico
Bon Dia a puntra dicon gobierno no a opta pa haci un destaho publico den e caso aki mirando cu a haci uno si pa e hotel di Bushiri. Sevinger: “Un destaho publico ta wordo haci na momento cu bo tin un propiedad cu tin un balor. Ora cu tin un tereno habri no tin destaho publico. Gobierno ta dicidi ken e ta duna a base di su business plan. Si bo pidi tereno pa algo cu ta fit den nos liña di maneho; green, tecnologia etc. Si tin e tereno disponibel bo ta hay’e. ”

Peticion pa tereno comercial
Nos a puntra e mandatario con ta evalua ken ta haya e tereno si tin mas grupo di inversionista cu ta pidi pa e mesun tereno y ta cumpli cu e rekisitonan. “Una bes bo entrega bo peticion y ta cay den e liña di maneho di nos e vision di gobierno, esun cu a entreg’e prome ta hay’e. Si e no cumpli, e ora e otro ta hay’e despues di dje.” Hopi ta haci e peticion direct na DIP (Departamento di Infrastructura Publico)  y nan ta tuma contacto cu gobierno. Hunto nan ta dicidi cua inversionista ta haya e tereno y hopi ta bin direct na e ministerionan si ta den e caso di un hotel; nan ta bay ministerio di turismo, asunto social y infrastructura pa presenta nan proyecto.

Rekisitonan
Sevinger: “Ta depende ken ta pidi y di ki forma bo ta pidi. Esaki ta un problema cu persona local ta pidi un tereno, tin biaha e no tin e forsa pa haci e proyecto ey. Nos ta dun’e e tereno toch y despues bo ta tende cu el a bend’e etc.. Ora bo duna grupo di afo bo ta tende di otro banda cu hende local no ta haya chens. ”

E minister ta enfatisa cu nan ta evalua e proyecto manera cu e bin sea e ta local of internacional y ta otorga e tereno si e ta disponibel. Bo ta haya un cantidad di rekisito pa cumpli cu ne entre otro MER (rapport cu efectonan pa medio ambiente) y garantia di banco cu business plan, cual hopi hende ta faya riba dje, segun minister Sevinger. Pero den e caso e peticion toch ta drenta pareu y ta cumpli cu tur rekisitonan, e decision ta basa riba cual di e proyecto ta cay den e vision di gobierno actual, e conclusion ta a base di entrevista cu e minister di infrastructura.

Tereno pa famia Arends
Finalmente e ta desmenti cu e terenonan di hotel a bay na un compania local, manera a sali den un corant di un fuente anonimo cual nan a distribui siman pasa por nada. E corant aki ta ataca Leoncita Arends y diferente ministernan di corupcion, soborno y manipulacion cu tereno. Nan a publica cu famia di sra. Arends a haya un optie riba 42.096 m2 di tereno na Seroe Colorado pa traha un hotel di 250 camber cu casino, bou e compania Charm Rock Development. Aunke e compania ta existente, Bon Dia Aruba no por verifica e resto di e contenido. E manera menciona, minister Sevinger ayera a desmenti cu a duna tereno na un grupo local pa construi hotel na Seroe Colorado.