Diaranson dia 12 di juni proximo lo tuma luga den Cas di Cultura ( sala Unoca) un tremendo Fundraising Conference titula ‘100 % Tata: un compromiso cu bo famia’.
Tin un urgencia den nos comunidad pa duna un man na tur tata, pa garantisa paz, amor, respet y sinceridad den cada cas di Famia. Pero di berdad tata ta e cabes di cas, y dilanti di Dios e no por wordo reemplasa. Hopi biaha bo ta haya tata cu no ta cumpli cu nan deber, pero den tur sentido nan ta keda tata.
P’esey nos Mount Horeb Ministries/Fortaleza pa Famia ta extende nos invitacion pa e anochi na e prome 100 tata cu cumpra carchi, pasobra e sala ta carga solamente 100 persona.
Nos a scoge e sala aki pa asina nos por pone atencion na tur tata, y atende nan manera mester ta.
Tur tata lo ricibi un regalo riba e anochi aki.
Nos ta kere cu cada yiu cu stima nan tata, lo cumpra un carchi y regala nan tata.Nos a inclui transporte den e programa, pa asina nos por busca papi na cas y trece papi bek. Corda haci bo reservacion na tempo.
Lo ta bay ta anochi di curashamento, cual lo pusha e tata manda dilanti, tanto den conocemento, curashi, y amor.Tur mama y yiu cu kier compaña e tata tambe ta bon bini.
Tata ta cabes di cas, su deber ta di provee, cuida, controla, y stima su famia.
E laso entre un homber y su yiunan ta dificil pa kibra, e ta un compromiso pa semper.
Un tata semper ta y lo keda responsabel pa su yiunan aunke nan no ta na cas mas, un tata no por cera porta di su curason pa su yiunan
Nos ta bibando den tempo dificil, caminda materialismo ta cumpra consenshi di hende, y hende ta bandona nan posicion pa asina complace cu nan mes of cu otronan.
Nos meta ta pa durante e Fundraising Conference aki duna conseho, restaura relacion entre tata y famia, restaura compromiso spiritual, y tambe activa e soño di un tata.
Hopi biaha bo ta haya un tata tin un soño , pero segun tempo ta pasa, e ta laga e soño bay, pasobra e ta pensa cu e no por mas. Pero tata no perde speransa, pasobra tanten bo ta na bida y cu fe y confiansa den Dios, bo ta logra.
E Fundraising/Conference aki lo ta destina pa print e buki ‘Kico Tin Tras di Tralie’ den idioma Ingles, Spaño, Creole, y Hulandes, pa asina sigui preveni cu hubentud cay cera, preveni violencia domestico, abuso di mucha, y division den famia.
Tambe pronto nos lo tin un website, caminda lo tin bon y berdadero conseho pa evita maldad en general, specialmente abuso di mucha y violencia domestico. Pa mas informacion: Tel 567-7234 of WhatsApp 74003237, of e-mail horebrhemagmail.com
