Nos tin binti aña pa paga…

Segun e manera di pensa di gobierno saliente, 100 miyon florin extra na gasto di renobacion di hospital no mester ta problema. Ningun di e proyectonan PPP ta un problema, pasobra tur ta pa paga den binti aña o mas. Anto segun nan e no ta haci dolor, un tiki so… E problema cu nan ta purba sconde ta cu e dolor aki ta bin riba e monton di otro dolor cu nos tin caba, causa pa e debenan directo cu pais Aruba tin, cu ta montona na mas di cuatro mil miyon florin, cu ta costa nos na pago di interes so caba mas di 200 miyon pa aña. E proyectonan aki di construi awe y paga mañan ya ta montona na mas di 80 miyon florin pa aña, pa e proximo dos decada por lo menos. Pero esey no ta tur.

E problema mas grandi di e momento aki ta e falta di respet pa parlamento, pa transparencia y dunamento di cuenta di operacion di gobierno na un manera normal. Pakico, si algun tempo pasa e ministro saliente a confronta critica y duda encuanto e gastonan extra di e proyecto di renobacion den parlamento y a opta pa hala atras momentaneamente, pa e tin mas tempo pa haci su huiswerk, y bolbe den parlamento cu un informe completo. Por lo tanto e reunion a wordo suspendi, te proximo aviso. Y si e mandatario mes ta declara cu no tin nada di sconde, pakico anto mester scoge pa un caminda cu ta lanta duda di su manera di anda cu e asunto.

Asina no ta mas cu logico cu actual oposicion, o nos mester bisa e mayoria den parlamento cu proximamente lo apoya un coalicion nobo, mester supone cu ta miho pa investiga e asunto aki. Y sigur den e caso di un suma asina grandi nan realmente no tin opcion di keda sin investiga. Cu no ta necesario pa cuminsa grita corupcion prome cu tin indicacion di esaki, esey no ta mas cu normal, pero di otro banda no por cuminsa critica un gobierno nobo si nan ta bay te fondo di e asunto aki; nan tin e responsabilidad cu comunidad pa haci esey. No ta cuestion cu un man yen di parlamentario di cualkier color politico kier haya sa cierto cos; ta pueblo en general tin derecho di sa ta kico ta haci cu su placa, y pio ainda si ta placa cu ni sikiera t’ey ainda; nos mester bay gana esey den e añanan nos dilanti.

Pero e asunto aki no ta trata solamente di un ministro cu a cuminsa bira malcria y a bandona, nos no sa pa ki motibo, su tono respetuoso di un par di aña pasa, pa join e actitud desafiante di su coleganan, ademas di e lenguahe cayehero di nan. Aparentemente, arogancia di poder ta algo inevitabel. No ta trata tampoco di critica y reta e gobierno entrante, pasobra den pasado tal o cual di nan hendenan tambe a haci algo contra ley. Nan tambe a lesa bon cla e mensahenan cu ta biniendo for di Madre Patria, cu ta pone enfasis pisa riba integridad, independiente di ken ta den gobierno y ken ta esun cu mester investiga, eventualmente detene y procesa hudicialmente. Si e caso Ibis contra nan colega ministro tabatin algo di positivo, ta hustamente cu a duna u señal bon cla na henter comunidad, y tambe na e ministronan saliente, cu a yega un fin na e impunidad ministerial cu tabata haci ta asina dushi pa ta ministro na Aruba, pasobra por a haci cualkier cos contra ley y semper tabatin un mayoria den parlamento pa frustra cualkier intento di pone un mandatario responsabel pa loke e ta haci, ignorando e daño grandi cu e persona por ta haciendo na nos comunidad.

Awor cu Aruba tin un parlamento nobo, lo ta bon si esunnan cu a wordo eligi pa ta representante di pueblo realisa cu nan ta opera den un tereno cu a cambia. Si e parlamento nobo, en todo caso e mayoria cu ta bay apoya gobierno, ta desea di sigui opera manera semper, nan por hacie. Si nan logra gaña pueblo y ta tolera cos intolerabel di esunnan cu nan mester controla, nan por hacie. Pero ora awa pasa hariña, lo pone nan un banda, manera a sucede algun biaha caba den e gobierno cu ta concluyendo trabao den e dianan aki: na 2014 poniendo un banda un presupuesto aproba pa parlamento na 2015 obligando parlamento pa aproba e ley di supervision financiero, y na 2017 e intervencion hudicial Hulandes den e caso Ibis, mustrando na nos tur den e comunidad aki cu tin limite na e impunidad di mandatario, pa mas cu por tin un parlamento di mucha manda cu ta aplaudi y tapa tur cos cu e top dognan di partido por ta haci como ministro.

Den e sentido aki nos ta spera di mira un cambio ainda. Mester hende di peso den e partidonan cu ta tuma asiento den parlamento cu e votonan pa por papia cu autoridad. Asina so por cuminsa un cambio fundamental den nos sistema parlamentario.