Directiva di Stichting Verstandelijk Gehandicapten Aruba (SVGA) a organisa un rueda di prensa ayera atardi pa informa con a sigui cu e desaroyo despues di e candela na e seccion di Pasadia Briyo di Solo. Pa restaura e tres localidadnan afecta door di e candela aki lo costa un suma rond 100.000 mil florin segun e directiva a mas o menos calcula te ainda.

E restauracion mes lo costa hopi mas cu 100.000 florin segun e fundacion, pero nan ta spera cu esey lo wordo paga door di seguro. Pa cumpra e inrichting nobo lo tin mester di 100.000 florin nan ta calcula, anto ta pidi cooperacion di comunidad pa yega na esaki. Manera ya nos a publica siman pasa, tabata tin un candela cu a start na Pasadia Briyo di Solo riba 17 di augustus. Esaki a destrui tres localidad y laga decenas di hende cu necesidad di cuido special sin luga pa bay temporalmente. Ainda e causa di e candela no ta conoci y no ta parce cu lo bira dificil pa tin bista riba kico por tabata e causa di e candela, segun e organisacion a compronde for di autoridadnan. Nan a logra di haya ayudo caba pa cera e tres localidadnan kima, y tambe un container pa warda e cosnan cu ainda por wordo uza of drecha.

Sinembargo ainda nan no por tuma e clientenan pasobra no tin luga y no ta tur cos ta cla pa nan habri bek oficialmente. E seccion di e luga aki bao di Stichting voor Verstandelijk Gehandicapten Aruba, ta uno hopi importante pa e 60 clientenan special cu actualmente ta pasando den dificultad cu luga di keda. Mayoria di nan ta kedando na diferente familiar y conoci pa mas cu dos siman caba. Un mayor di un di e clientenan a presenta na e rueda di prensa ayera pa haci un apelacion pa yuda e luga. “Tres siman a pasa caba y ningun hende a haci algo ainda. Si tabata cualkier otro scol publico, yudansa lo a yega mesora. Esakinan ta muchanan cu necesidadnan special nan tambe ta hende,” e mayor a comenta.

E fundacion ta sigura
Esaki tabata un susto y prome experiencia pa e organisacion cu nunca a yega di pasa den un situacion asina. E clientenan ta custumbra pa bini akinan diariamente, pero actualmente esaki no ta posibel manera nos a menciona. Esaki tambe ta fastioso pa e empleadonan cu tampoco por sigui cu nan trabao ainda. “E fundacion ta bon sigura. Nos ta periodicamente trata esey cu e compania di seguro. Sinembargo nan ta paga pa e dañonan haci y no e diferencia di e gastonan nobo. E edificio ta nobo y den bon condicion, pero mas tanto e parti interior, tin mueblenan poco bieu cu tabata bon cuida pa uza ainda. Seguro no lo cubri esakinan,” penningmeester di Pasadia Briyo di Solo Reint Schutter ta bisa. No tin bista ainda tampoco riba con largo nan lo mester keda sin por atende e clientenan. Un otro solucion ta purbando pa wak si nan por aloca nan un diferente caminda mientrastanto.

Donacion
E organisacion kier a comparti nan informacion di banco y ta habri pa tuma cualkier donacion cu lo definitivamente yuda na e momentonan aki. Tur pagonan por bay na: Stichting voor Verstandelijk Gehandicapten Aruba. Adres: Piedra Plat 86-A, cuenta di banco: 91603209, banco: Caribbean Mercantile Bank NV, adres: Caya G.F. Betico Croes 53.