E alarma a cende  10:15 di mainta ora cu e biga principal di un edificio di siete piso, cu tabata den construccion, a cuminsa cay. E edificio tabata situa na bario Blas de Lezo, Cartagena, Colombia. Grito di advertencia tabata ser scucha den e lugar, cu obhetivo di logra cu tur hende lo a core sali pafo di e edificio. E situacion ey a genera miedo cerca 40 obrero, cu tabata traha den e structura ey. Dies un  trahador a logra bula pero nan a keda herida. Otro trinta a keda atrapa den e escombro.

Trescien y cincuenta persona di diferente organismo di asistencia a participa activamente den rescate di obrero. Cinco persona a ser haya sin bida, mientras otro cinco cadaver a ser rescata diabierna mainta, pa un total di 10 hende cu a fayece. Te cu diahuebs un persona so a drenta na morgue di Medicina Legal y a ser identifica como Omar Mendoza.

Mey mey di aplauso y alegria di banda di comunidad, hopi Colombiano tabata duna un bonbini pa un bida nobo na cada obrero cu a ser rescata for di escombro di e edificio cu a derumba. 21 persona a ser traslada pa hospital.

Manuel Vicente Duque, alcalde di Cartagena, a bisa cu el a papia cu un obrero di Venezuela cu a bisa cu su ruman  tabata den escombro, un piso  abao. “Mi a papia cu e mucha y el a bisa mi cu su ruman tabata eynan”.  E hoben ta un sobreviviente y ta bisa cu el a cay di un piso ariba, pero su ruman tabata abao”, Duque a splica.

Diesdos ambulance tabata warda riba hende herida, pa asina por traslada nan pa clinica Blas de Lezo, Bernarda, Gestion Salud, Barú y pa Hospital Universitario di Caribe. E zona a keda cera y protegi di banda di polis y na e lugar a traslada miembro di “Escuadron Anti disturbios.”

Famia a cuminsa yega na e lugar di construccion.
E dolor ta uni tur famia di e obreronan cu a cuminsa yega na e lugar,  pa asina haya sa di e sucedido cu a tuma lugar cu nan hende stima. E angustia, miedo y impotencia tabata e sentimento di tur famia cu a yega na e lugar, pasobra nan tabata mira cu organismo di asistencia no tabata duna ningun reporte cu por informa cual tabata e persona cu a ser rescata pa personal di rescate. Un pa un famianan tabata yega y mesora a keda reteni pa polis. Autoridad policial a cera e lugar pa asina organismo di asistencia por haci su labor di rescate.

E caso aki a laga cla cu no tin ningun control riba urbanisacion na ciudad di Cartagena, pasobra plan di ordenamento teritorial (POT) di e zona ta permiti construi edificio di maximo 4 piso, pero e edificio cu a cay na Blas di Lezo II tabatin 7 piso caba. “No tabatin permiso pa construi, nan tabatin un licencia falso pa gaña hende y autoridad” Manuel Vicente Duque , alcalde di e ciudad a bisa. El a priminti pa bira mas duro contra hende cu ta construi na Cartagena.