10 biaha el a bira campeon mundial. Su prome titulo mundial el a gana na Aruba, un soño grandi di dje y dialuna un otro soño grandi a bira realidad: e presentacion pa prome biaha di su buki ‘To fail or to succeed is a choice!’. Un primicia pa Aruba y tambe remarcabel como cu e awor ex deportista y autor a nace riba nos isla.
Su nomber ta Jerry Morris y locual por constata, e no ta mucho conoci riba nos isla. Por ehempel tin un ‘wall of fame’ pero sin su cara riba dje. Mientrastanto su logronan ta excepcional considerando cu e ta bin for di un isla chikito: 5 biaha campeon mundial den Muay Thai kickboxing y 5 biaha den Shidokan full contact karate. Banda di esaki el a bira varios biaha campeon Europeo y Hulandes. Tambe e tabata e prome campeon di mundo for di e region di Caribe. Sinembargo durante e charla cu sr. Morris a duna dialuna den biblioteca nacional, su enfasis tabata mas pa inspira hende con nan por logra nan metanan di bida, pa duna nan un modelo di logra nan den un forma exitoso y splica kico ta e obstaculonan. “Despues cu mi a ter mi achillespees y mi mester stop cu competencia, mi tabatin hopi frustracion den mi. Ma cuminsa skirbi den un schrift, oranan tras di oranan.”
Mester splica cu sr. Morris a lanta hunto cu su ruman bou circunstancianan dificil. Nan a muda asina hopi cu ora e tabatin 10 aña el a cambia di scol tur e 10 aña di su bida. El biba den pleeggezin y cerca diferente miembro di famia. Su mama tabata traha hopi y tabata laga e y su ruman na cas nan so fei chikito. Cada biaha ora nan mester muda, nan mester defende nan mes na scol y den e bario. Nan tabata bringa tur ora cu sr. Morris ta conclui cu pa motibo di esey el a logra asina leu den su deporte.
Durante su charla e ta conta cu bo no por ta exitoso si bo no ta fracasa. “Faillure is part of succes. Cada faillure bo mester wak como un les pa haci miho e siguiente biaha cu bo ta purba. Bo ta siña di dje cu otro biaha bo mester haci’e miho y mas sabi. Na caminda bo ta siña cada biaha con y kico bo mester haci. Bo ta haya mas experiencia, conocemento y sabiduria.”
E problema mas grandi, e ta subraya, ta cu hende ta stop mucho trempan. “E dos obstaculo ta assumptions y lack of determination. Pues hopi hende no ta persigui nan soñonan pa motibo di kico nan ta pensa of kico otro hende ta pensa. Pero bo mester actua a base di echonan, opinion. E otro ta bo mester keda determina. Si bo ta determina, bo no ta worry cu kico otronan ta bisa bo.”
Bon Dia Aruba a ricibi su buki pero no a haya chens ainda pa lesa esaki. Momento cu lesa e buki completo, lo publica un relato. Pero sigur nos ta bay tende mas di sr. Morris pasobra e tin plan pa bin Aruba pa comparti su experiencia. Na Hulanda e tin su centro di deporte awor y banda di esaki e ta duna les di gym na scol.
