’10 aña y ainda Museo di Betico no a habri’

E artista, director y curator di fundacion Ateliers ’89, sr. Elvis Lopez a declara na Bon Dia Aruba cu den cuadro di e acontecimento importante di 30 aña di Status Aparte y 40 aña di Himno y Bandera,  e ta haya “pica” cu te ainda nan no ta balorisa Betico, manera mester ta. 

Di un banda Centro di Betico na Santa Cruz no tin mayor desaroyo durante e ultimo añanan. “Eynan bo ta mira cu, ora bo ta traha cu e hendenan, cu nan mes no kier progresa”, el a bisa.  E ta considera cu ta importante pa traha un bon ambiente y mustra e persona semper con ta miho. 

E ta haya cu ta importante pa keda semper draai pa miho, sinembargo e ta ripara cu na Aruba hopi hende ta discrimina otro inconscientemente. E artista Elvis Lopez ta  considera relevante cu pa nos por educa debidamente nos pueblo, bo mester mustra miho. 
“No warda 30 aña pasa anto bo tin un museo na Santa Cruz cu te ainda no ta habri”, el a declara.  E ta recorda cu e fundacion tin 10 aña cu nan tin e museo di Betico y nan tin e yabi, pero e no ta funciona normalmente. 

E no ta compronde con ainda nan no a pone funciona e museo aki y habri tur dia na Santa Cruz. “Unda e problema ta? Ken ta e problema??? asina e artista critico aki ta puntra su mes. 
E ta haya cu tur estadista Arubiano cu a contribui pa nos Status Aparte tin nan elogio. Henny Eman bieu tin su estatua, tin monumento 18 di Maart y tambe tin Plaza di Betico, ya cu cada un di nan tin nan merito y nan reconocimento tambe. Pero e ta haya cu e unico hende cu nan ta tapa dia 18 di Maart cu ta su dia, ta Betico. 

Un aspecto cu el a trece cu preocupacion ta cu nos propio hende ta esun cu ta daña nos propio cultura y no e hendenan cu ta bin di afo.  E ta bisa: “Nos hendenan mes ta eusn cu ta caba cu nos cultura…” Ya cu si nos no por siña nos propio muchanan di scol pa ehempel ken ta Betico, anto kico nos ta celebra den cuadro di 30 aña di Status Aparte y 40 aña di Himno y Bandera.  E celebracion aki ta uno caminda nos ta celebra nos cultura y aunke tur hende ta bisti den cuadro di e conmemoracion aki, masha poco di nan sa kende tabata Betico…