Den cuadro cu e caso lamentabel di asesinato di director di Serlimar sr. Richard Fingal, hues a duna sentencia di 10 aña di castigo na e dama nacionalidad Chines. Homicidio a keda comproba y a sali afo cu e dama Chines a intencionalmente kita bida di Fingal. Menasa cu morto tambe a ser comproba. E abogado a hiba defensa propio pero corte a rechasa esey.
E acusado a haci su mes culpabel na homicidio door di hinca victima varios biaha den pecho, hink’e mas biaha y dal e cu un martio.
Hues no ta exclui cu e victima a gara tene e sospechoso cu intencion sexual. Pero el a reacciona desproporcional y sin hustificacion. Homicidio ta un di e crimennan mas pisa cu tin segun Ministerio Publico, e bida ta e bien mas precioso di e ser humano. Consecuencianan di homicidio ta ireversible.
“Cold Blooded”
Fiscal a describi e dama como un persona “cold blooded” pasobra e no a mustra mucho emocion ora cu polis a bin atende cu e caso. E tabata cubri na sanger, pero e tabata basta calma. Fiscal ta señala cu e dama a cambia algun elemento di su storia varios biaha. Fiscal a pidi hues tambe pa rechasa e apelacion riba noodweer of noodweerexcess. E sospechoso no a duna un motibo of splica e rason pakico e victima mester a muri. Segun Ministerio Publico: “E no a merece, no pa e supuesto avansenan indesea cu e lo a haci, manera e sospechoso ta bisa.”
El a muri un morto horibel segun descripcion di fiscal, cu heridanan na su pecho, barica y brazanan. E sla riba su cabes cu martio tambe a causa hopi daño. E luga tabata completamente na sanger. Fiscal a mustra un video den corte unda bo ta mira e porta di glas ta sacudi. Esaki tabata e momento cu e victima a ranca e porta cu forsa pa purba habri e. El a sufri hopi prome cu el a muri anto sclama pa su bida. Segun fiscal, testigonan a tende sr. Fingal ta yora: “Mi tin famia!” y tambe gritando pa yudansa. Fiscal ta bisa cu e no ta kere den e storia di defensa propio pasobra no tin indicacion di violencia segun inicio di storia di defensa.
Fingal aparentemente solamente a carisia y brasa e dama, anto e no a gusta e manera con el a cuminsa papia cune. Fingal a brasa y wanta e man di e dama, cuminsa bis’e cosnan manera “bo mester purba un arubiano, nos ta mas dushi”. A inicia un confrontacion cu a bay for di man. E dama no tabata tin ningun herida riba su curpa, mas bien indicacion cu e tabata tin mas forsa cu e victima, por a scapa,gara telefon y bay pafo di e luga, si e tabata tin miedo manera cu el a indica, pero no a haci e. Fiscal a señala cu no tabata tin ningun indicacion cu un massage a tuma luga of cualkier otro tratamento, mas bien un tipo di ‘get together’ cu bebida. Locual ta sospechoso tambe segun fiscal, ta cu Fingal a gaña su famia y bisa cu e ta bayendo un tipo di evento e anochi ey.
Defensa
E dama M.T. tabata conoce sr. Fingal pa varios aña caba y de hecho tabata practicamente bisiña di dje na Calbas. Fingal y e dama a palabra cu nan lo topa e dialuna anochi ey parti atardi, pero despues a palabra pa 7’or na e sitio na Piedra Plat. Segun e prome declaracion cu Bon Dia Aruba a haya aña pasa for di abogado Lejuez, pa evita cu mas cliente lo a bay na e sitio, e dama a pidi sr. Fingal pone su auto na Bright Bakery. Fingal sin embargo a sugeri pa e dama bin busk’e na Four Seasons anto el a laga su auto eynan para bao di un palo di kwihi. E dama a considera e tratamento aki como un excepcion solamente pasobra nan ta amigo anto e normalmente no tabata duna massage na hende homber. “El a yega di haci e solamente pa Chines pero ora cu e Chines bin cu e casa,” sr. Lejuez ta bisa. Cos a cuminsa bay robes ora cu sr. Fingal a cuminsa papia cu e dama, 30 pa 40 minuut despues di e tratamento, bisando e cu “e ta hay’e bunita, cu e stim’e y pa hopi caba.” Aunke cu e dama tabata bis’e pa stop, Sr. Fingal a continua te ora cu el a tene e dama di tal forma na su curpa cu e dama no por a move su man. Akinan un confrontacion a start entre nan dos. E dama a pasa man pa un cuchiu cu tabata cerca y hinca Fingal na su bariga. Fingal a rabia y segun e dama, menas’e y bis’e “awo si mi ta bay mata bo!”. Akinan e confrontacion a sigui y e dama tabata practicamente bringando pa su bida na e momentonan aki. Ambos ta bringando pa kita e cuchiu anto e ultimo staka a resulta pa motibo cu nan a slip, y Fingal su curpa a pusha riba e cuchio. Akinan Fingal a cuminsa sangra masha hopi mes, bisando algun cos cu e dama ta bisa cu e no por a compronde. E dama despues a sali pafo den shock y acudi na un persona pa ayudo.
