“Gang di arte…nos ta heroe, Gang di Arte..nos ta heroenan, Gang di Arte poderoso..”. Riba e ritmo di “vivir mi vida” di Marc Anthony, un grupo di hoben cu un pasion pa arte a habri show na 2013. Un di e memorianan mas bunita di mi bida.
Pero prome cu 2013, mi tabata basta familiar cu Gang di Arte caba. 2013, djis tabata un memoria extra special. Diabierna pasa ora mi a habri Facebook, cu mi a wak tur e hobennan cu nan premionan, mi a wak diferente video di presentacionnan y lesa diferente reflexion di hobennan cu a participa. Tambe e hendenan cu a presencia e anochi, a expresa con nan no por ni comprende cuanto talento tin riba e isla. Mi no por gaña, mi wowonan a djis yena cu awa. Yora pasobra mi ta leu, pasobra mi tin friu, pero mas tanto pasobra misa precisamente kico “Gang di Arte” ta significa pa e hobennan Arubiano cu ta participa. Diferente na otro competencianan artistico cu ta tuma luga rond di e isla, Gang di Arte, no ta limita su mes un solo forma di arte y ta ofrece hobennan libertad completo pa haci kico nan kier riba escenario. Pero mas cu elogio, pa e echo cu e ta un programa artistico intenso, di calidad halto y completamente gratis. Cu ta haci cu hopi mucha cu tin menos recurso ta sali afo y participa sin berguensa. Locual ta haci Gang di Arte asina impactante ta cu e ta duna hobennan un plataforma pa expresa nan mes sin pidi nada a cambio, excepto nan talento, disciplina y entusiasmo. E ta crea un espacio unda tur e muchanan ey cu pa nan amor pa arte ta wordo considera “straño” ta sinti sigur pa ta nan mes, rond di otro cu conoce e sentimento aki.
Aruba, ta sufri di algo cu mi ta yama “bully culture”. Pa un of otro motibo, hende ta kere cu insulta y pone otro sinti menos basa riba diferencianan ta algo pret. Termento ta cuminsa hopi trempan, puntra juffrouwnan di scol. Puntra mayornan con nan yiunan ta bin cas ta yora pasobra nan ta wordo tenta na scol. Tempo di MAVO, na 2009 ora mi a cuminsa skirbi na serio tambe hopi hende tabata tenta mi. Mi a competi den Arte di Palabra, mi a gana y ainda nan tabata tenta mi. Mi tabata sinti asina insigur di mi talento. El a tuma mi por lo menos un dos añanan ey pa laga bay di sinti berguensa pasobra mi tabata skirbi, e añanan cu a sigui mi no a competi mas. Y si di berdad mi por a papia di tur e mensahenan cu mi ta haya di hobennan cu kier ta nan mes, kier skirbi, kier baila, ta pinta of tin un otro sorto di talento pero ta sconde esaki pa miedo di wordo husga. Mi no lo caba nunca.
Pa 10 aña caba, Gang di Arte a duna e “weirdos’ nan manera nan ta wordo categorisa
Un plataforma. E euforia cu e hobennan ey ta sinti desde e proceso te na e anochi final di Gang di Arte, ta algo cu niun hende cu no ta nan por describi. Y ta e motibo ey, mi a dicidi di skirbi tocante Gang di Arte e siman aki. Pa subraya con importante e ta pa duna hobennan nan momento pa briya, pa ofrece nan espacio pa desahoga y ta nan mes. Fuera di e presion di scol y bida cotidiano. Fuera di tur expectativa cu nan mayornan, familiarnan y sociedad tin di nan. Pa nan por tin un luga leu di tur e mal comentarionan cu nan ta lesa tocante nan generacion tur dia riba internet. Sinceramente mi ta spera programanan manera Gang di Arte, cuminsa ocupa mas importancia den wowonan di gobierno of companianan priva cu tin modo di sponsor e iniciativanan aki.
Mirando, cu tabata tin añanan cu e organisadonan a traha cu hopi tiki fondo pero a lucha pa duna e hobennan nan momento. Aruba ta yena cu talento, manera semper mi a bisa. Y lo unico cu ta diferencia nos hobennan di esunnan ey na Merca cu ta parce cu ta bira superstars di un dia pa otro, ta oportunidad, hende pa inverti y kere den nan. Tur e “aspiring” performers di awe, por bira nos artista profesional mañan. Solamente mester duna nan un chens.
Aruba ta na caminda pa un revolucion artistico, esaki ta obvio. Tin algo den aire, cosnan ta pasando. Hobennan djis mester un audiencia y un stage, pasobra riba nan mes caba nan ta un show.
