Despues cu publicacion di e entrevista cu e presidente di nos Conseho Electoral Hubert Maduro riba e problema cu e rijbewijs nobo pa voto, e instancia a manda un relato. Unda ta splica cu aworaki 10.000 votado mester aplica pa un paspoort of ID valido pa por voto na september.
Esaki a sali for di nan investigacion a base di informacion den Censo. Di e 71.000 votado, mas cu 60.000 tin un paspoort of ID valido pa 22 di september. E otronan manera menciona no tin. Pa cu e rijbewijs nobo cual gobierno a cuminsa distribui for di 2015, te awor no por uza nan como identificacion valido manera nos a publica riba 1 di juli den nos corant. Sinembargo den e caso minister di Husticia lo cambia e decreto ministerial retroactivo, pa cu e Landsbesluit articulo 2 di e Landsbesluit rij- en keuringsbewijzen, e ora e Conseho Electoral si lo acepta e rijbewijs di 2015.
E Conseho tambe ta conseha pa esunnan cu tin un rijbewijs nobo, pa controla esaki si e datonan riba e rijbewijs ta cuadra cu esunnan registra na Censo. Den e caso tin un discrepancia, nan ta conseha pa reemplasa e rijbewijs.
E Conseho Electoral a haci un investigacion di rijbewijs emiti entre juni pa november 2016. Nan a compara e datonan riba e rijbewijsnan cu esun registra na Censo y a conclui cu di 1500 rijbewijs e datonan no ta cuadra cu esun di Censo. E Conseho ta remarca cu e foutnan aki cu nan a haci durante di traha e rijbewijs, ta trece consecuencianan grave pa verifica e identidad di e persona.
Cambio di presidente
Den e otro relato e Conseho tambe ta informa cu desde 17 di juli lo tin un cambio den e president di e Conseho Electoral. Corte Comun y Controlaria General a nombra Glenn Thodé (rector di Universidad di Aruba) como e presidente nobo di e Conseho Electoral y Hubert Maduro (cu tabata e presidente) como vice presidente.
