Tiara Air (2).jpg
Director di Aruba Tourism Authority (ATA) a declara cu lo purba di haya e miyon florin bek cu a duna Tiara Air na 2013 pa scapa bancarota. Sin embargo aña pasa e director di Tiara a bisa Bon Dia Aruba cu esaki ta trata di un donacion. 
 
E director Alejandro Muyale a declara esaki durante e caso den corte hunto cu e mas cu 150 creditornan un aña pasa. El a pidi e creditornan y hues pa duna e compania mas tempo pa drecha e situacion. Sr. Muyale a presenta un plan pa entre otro cuminsa bula bek y tambe pa cuminsa paga e (ex) empleadonan cu ainda mester cobra un total di 1 miyon florin. 
 
Mayoria di e creditornan a bay di acuerdo cu e plan aki. Un di e creditornan presente tabata ATA. Bon Dia Aruba a puntra e tempo ey tambe ki dia Tiara lo cuminsa paga e 1 miyon florin bek na ATA como cu ta placa publico. Pero sr. Muyale a mira e situacion otro. Segun e, e placa aki tabata un donacion di parti di gobierno pa asina salba e compania na 2013. Na e momento ey e compania hera bay bancarota pa motibo di e miyones pega na Venezuela. Minister Otmar Oduber di Turismo y Transporte a bay parlamento hunto cu minister di Financia Juan David Yrausquin pa asina pidi sosten di parlamento pa e inyeccion financiero. 
 
Parlamento den forma unanimo a aproba e plan di gobierno pa yuda Tiara Air y asina scapa e trabou di mas cu 130 trahado. E tempo ey a palabra cu momento cu e compania di avion ta riba su pia bek, a cambio lo duna servicio di mercadeo etc. pa ATA. 
 
Despues sr. Muyale su declaracion, Bon Dia Aruba a puntra ATA pa un reaccion. December 2015 director di ATA Ronella Tjin Asjoe a laga sa cu no ta trata di un donacion. Pero di ‘di palabracionnan haci a base di cual Tiara lo mester presta na ATA cierto servicionan di marketing y promocion’. E palabracionnan a haci na escrito, segun e directora. 
Despues e caso den corte unda mayoria di e creditornan a bay di acuerdo cu e plan di rescate y tambe hues a aproba esaki, nos a puntra ATA varios biaha si Tiara Air ta cumpliendo cu e palabracionnan haci. Y si ATA ya a cuminsa exigi e servicionan for di e compania di avion. Sin embargo Bon Dia Aruba a keda sin haya contesta. 
 
Awor cu Tiara Air finalmente a bay bancarota, ATA ta informa nos partner den noticia cu ta purbando di haya e placa bek. E director tambe ta informa cu Tiara ta debe impuesto ainda, esta  ‘travel promotion levy’ cu ya a cobra e pasaheronan. E debe aki si tin preferencia compara cu e otro debenan e compania tin cerca e otro creditoranan. Esaki pa motibo ta trata di un debe di impuesto. Sin embargo e 1 miyon cu segun ATA no ta trata di un donacion pero un fiansa, no tin prioridad. Asina mester warda riba e decision cual di e mas cu 150 creditornan ta haya nan placa (sea parcial) bek y cual no como cu no resta mucho pa parti.