Diadomingo 1 di october ta Dia Internacional di Adulto Mayor. Un dia pa subraya e importancia di e lucha pa bienestar, interes y inclusion di adultonan mayor, no solamente na Aruba, pero full rond mundo.

75 aña pasa, e Asamblea General di Nacionnan Uni a adopta e Declaracion Universal di Derechonan Humano, un documento crucial den e historia di derechonan humano cu ta articula e derechonan humano fundamental cu mester wordo protegi universalmente.

E aña aki ta di e 33 celebracion di Dia Internacional di Adulto Mayor y ONU (Organisacion di Nacionnan Uni)ta enfoca ariba e tema di cumpli e promesanan di e Declaracion Universal di Derechonan Humano pa adultonan mayor; entre tur e generacionnan.

E celebracion ta enfatisa e situacion particular di adultonan mayor full rond mundo, pa loke ta trata nan derechonan tocante con nan ta enfrenta violacionnan di e mesun derechonan ey y con e fortalecemento di solidaridad a traves di equidad entre generacionnan ta ofrece solucionnan sostenibel pa cumpli e promesa di e Obhetivonan di Desaroyo Sostenibel (SDG).

E obhetivonan di e Dia Internacional di Adultonan Mayor di ONU ta, entre otro, aumenta e conocemento global y conscientisa tocante e Declaracion Universal di Derechonan Humano y genera compromisonan entre tur e partinan interesa pa impulsa e proteccion di derechonan humano de e generacionnan actual y futuro di adultonan mayor na henter mundo.

Tambe, pidi e gobierno- y entidadnan di ONU pa revisa nan practica actual cu e meta di integra miho den nan trabao un enfoke di e derechonan humano durante henter e bida di e personanan. Ademas di garantisa e participacion activo y significativo di tur e partinan interesa, incluyendo e sociedad civil, e institucionnan nacional di derechonan humano y e propio adultonan mayor, den e trabao di fortalecemento di e solidaridad entre generacionnan

Na Aruba pa algun tempo e comunidad di adulto mayor ta enfrenta retonan den diferente aspectonan di bida personal y social. Pa prome biaha den historia un gobierno ta establece un ministerio cu e meta pa atende cu tur e reto- y necesidadnan cu tin cerca e comunidad di adulto mayor.

Den un esfuerso pa traha na beneficio di adultonan mayor, na final di luna di augustus Minister di Transport, Integridad, Naturalesa y Adulto Mayor, Ursell Arends, a anuncia un Foro Nacional pa Adulto Mayor cu lo tuma luga dia 17 y 18 di october.

E foro aki ta den colaboracion cu diferente stakeholder den comunidad pa asina trece henter e veld di adulto mayor hunto pa canalisa decisionnan concreto cu mester tuma y implementa e routemap pa e proximo 10 aña.

E organisacionnan cu ta encarga cu e planificacion di e foro aki ta APFA, SVB, AZV, OPPA y Ministerio di Adulto Mayor, Directie Ouderenzaken y Pensioenfonds.

Durante e anuncio di e foro aki, Minister Arends a remarca cu e meta di e foro aki ta pa na final di e foro firma un acuerdo pa delinea kico ta pasonan cu mester tuma pa traha na interes di e adultonan mayor. Tambe nan a acorda cu nan lo bin back regularmente despues di firma pa mira e obstaculonan cu tin, pa asina conhuntamente nan por surpasa esakinan.

Den e Foro Nacional aki, lo aborda diferente tema cu ta wordo ignora pa añas y cu segun Minister Arends a indica, ta hopi importante pa adultonan. E temanan ta inclui demografia, vivienda, bienestar, mobilidad y representacion.

E audiencia pa e foro aki ta componi di lidernan di casnan di cuido, academia EPI, Universidad di Aruba, sindicato, parlamento, dunado di trabao, compania di seguro cu ta enfoca riba pensioen, banco y NGO’s.

No ta desconoci cu e poblacion di adultonan mayor ta enfrenta cu e problema di discriminacion, sobre todo den e area di empleo. Minister Arends a remarca recientemente den algun caso ta menciona edad como motibo di exclusion obligatorio den e rekisitonan pa wordo nombra como miembro di un conseho. Un forma di discriminacion preocupante.

Den e cuadro di e vision pa stimula participacion di adulto mayor den comunidad, Minister Arends a solicita consehonan di tur instancia cu ta resorta bao di su carteranan pa identifica y elimina tur forma di discriminacion di edad di nan organisacion rapidamente.

“Discriminacion a base di edad ta innecesariamente ofensivo pa esnan afecta y tambe por perhudica e maneho di un organisacion. Edad ta aporta experiencia, conocemento y confiansa, cualidadnan cu mas bien mester wordo exigi di miembronan di un directiva. E exclusion arbitrario di candidatonan a base di edad, ademas di ta ofensivo, por causa un ‘fuga di talento’. Sector publico lo beneficia di elimina tur clase di edadismo, ora ta trata adulto mayor, di cada instancia,” el enfatisa.

Pa e motibo el a propone na Conseho di Ministro pa adopta e principio di no permiti e uso di edad como criterio pa contrata, nombra of despedi miembronan di directivanan. El a remarca cu nombracion y retiro den directivanan mester ta a base di cumplimento cu ‘Good Corporate Governance’. Esaki ta un vision cu su ministerio purba di realisa pa mita di otro aña 2024. “Pues tur forma di edadismo lo mester wordo elimina di statuutnan di entidadnan gubernamental pa e tempo aki.”

Segun calculacionnan di ONU, ta premira cu e cifra di adultonan riba 65 aña di edad na full mundo lo wordo duplica significantemente pasando di 761 miyon na 2021 pa 1600 miyon na 2050 y e cifra di adultonan riba 80 aña ta creciendo mas lihe ainda.