Mediante un anuncio haci riba su red social, minister di Husticia y Asuntonan Social Rocco Tjon a informa cu 1 di maart ta cuminsa e campaña nacional pa conscientisacion den trafico debi cu cifranan di accidente di trafico ta hopi alarmante.

A base di palabracionnan haci cu Alto Comisario Ramon Arnhem como tambe Alto Comisario Suplente Robert Candelaria, a tuma e decision pa bin cu mas vigilancia pa loke ta trafico na unda ministerio di Husticia y Asuntonan Social ta bay lansa un campaña nacional di conscientisacion di siguridad di trafico pa henter aña 2024, manera a ser anuncia na december ultimo.

Manera ta conoci, Aruba ta conoce hopi accidente di trafico, y a base di cifranan cu a ricibi, esaki a indica di ta stabiel, pero demasiado. Sinembargo, aun asina e ta alarmante, pa cual motibo a reuni cu alto comisario suplente Candelaria, y tambe cu alto comisario sr. Arnhem, caminda a tuma e decision pa aumenta visibilidad di parti di Cuerpo Policial y ademas, ta bay percura pa tin mas unidad riba caya, pa asina por atende cu e diferente situacionnan, entre otro di trafico, na un manera mas agil.

“Di parti di Ministerio di Husticia y Asuntonan Social, ta haci un apelacion na nos comunidad, pa ta hopi mas cauteloso den trafico. Ta pidi pa cada persona tuma nan propio medidanan di siguridad pa asina evita cu por keda envolvi den un accidente di trafico,” minister Tjon a destaca.

Pa e motibo aki, ta bay lansa e campaña nacional pa eleva e siguridad den trafico y tambe ta bay introduci diferente medidanan pa asina cubri e parti di siguridad.

Di igual manera, minister Tjon ta trece dilanti un punto di preocupacion pa loke ta trata di garantisa siguridad den trafico semper tabata e parti cu Cuerpo Policial a indica, cu no tin suficiente espacio pa por kita autonan for di caminda. Pa e motibo aki, na januari ultimo a aproba henter e proceso cu a ser inicia for di aña pasa, for di un comision multidisciplinario tambe, pa yega na un destaho pa por apunta un tercer partido cu ta bay encarga cu ful e parti aki.

E proyecto aki ta consisti di tres fase, e prome fase ta pasa un compania por garantisa cu tin suficiente takelwagen 24 ora pa dia, pa asina cada bes cu Cuerpo Policial tuma nota di un auto cu no tin seguro of no ta cumpli cu e rekisitonan, por ser kita for di caminda y hiba esaki na un sitio caminda e compania lo ta esun responsabel pa maneha e parti aki.

E di dos fase ta cu e compania aki mester dispone di un tereno grandi suficiente caminda por ubica tur e vehiculonan aki y di e forma aki no tin mester di pone e vehiculonan aki mas na warda di Polis cu tur e consecuencia cu esaki ta trece cune.

E tercer fase ta cu e compania aki, den cooperacion cu Cuerpo Policial y bou autoridad di Cuerpo Policial mester por maneha ful e parti administrativo y garantisa siguridad di e pertenencianan pero tambe percura pa e pagonan haci pa cada dia cu un vehiculo cu ta staciona eynan.

Di e forma aki lo keda traha riba cada aspecto pa garantisa y eleva siguridad den trafico. Un fenomeno cu ta causa hopi molester pa e ciudadanonan, pero cu lo ta hayando tur su debido atencion, manera minister Tjon a menciona

Manera ta conoci den cuadro di eleva siguridad den trafico pero alabes facilita trabounan di Cuerpo Policial pa loke ta kita vehiculonan cu no ta cumpli cu tur rekisito for di caminda, a inicia e proyecto di “bewaring, opslag en takeldiensten KPA”.

For di 19 di februari te cu 23 di februari tur interesado por haya tur documento relata na e proyecto aki na Centro di Husticia Macuarima.

Alabes por informa cu 6 di maart 2024 lo tene un reunion informativo na Cuerpo Policial pa tur interesado. Pa despues riba 20 di maart e destaho publico tuma luga.

Pa e topico aki algun usuario di rednan social a trece dilanti nan opinion tocante e tema aki caminda un di nan a sigura por ehemplo cu “mester tin un tereno special pa pone e autonan aki te dia nan doño bin paga nan debe si ta di pone nan riba otro lo haci e con cu para e vehiculo nan aki tin doño.”

Pa otronan e solucion ta algo mas sostenibel, “reduce and recycle them” y tambe otro persona ta señala cu no ta solamente autonan sino busnan cu tambe ta para riba cierto camindanan y manera a sigura, no tin suficiente espacio pa por kita nan, awor un proceso ta bay cuminsa pa asina un tercer partido por encarga cu e parti aki.