(NLTimes)—Aña pasa, 36% di adulto na Hulanda a bisa cu nan kier come mas saludabel. Un den seis di nan a bisa cu nan no tin placa pa cumpli cu e deseo aki pasobra opcionnan di cuminda saludabel ta caro, segun e oficina di estadistica (CBS) a reporta diamars.
E oficina a investiga kico ta preveni hende for di come saludabel. Ademas cu opcionnan menos saludabel ta mas barata, 46% di esnan cu kier tin un dieet saludabel a bisa cu tin biaha nan ta laga otro hende persuadi nan pa come menos saludabel, y 39% a bisa cu nan ta hay’e dificil pa bandona cumindanan menos saludabel.
Hendenan kier un dieet mas saludabel pa reduci e riesgo di problemanan di salud of malesanan. Aproximadamente mita (53.6%) a duna salud como e motibo pa mehora nan opcionnan di cuminda. Pa sinti fisicamente mas fit a ser menciona pa 28% di e respondientenan. Y 10% a bisa cu nan kier baha peso, mehora nan aparencia, of no subi peso.
E mayoria di residentenan Hulandes no kier a mehora nan dieet aña pasa. Mayoria, 58%, a bisa cu nan ta come saludabel suficiente caba. 5% di nan a bisa cu nan no ta pensa riba esaki, y 1% a bisa cu no ta considera cuminda saludabel importante.
