Ayera a haci net 1 aña cu a likida e hoben Dyron Franken na Noord. Su tata Juan Franken ta bisa Bon Dia Aruba cu tin dia e no por drumi bon anochi sabiendo cu ainda e agresor cu a kita bida di su yiu, ta den libertad.

“Mi ta pidi un hende cu sa of por sa algo pa por fabor papia pasobra nos kier haya sa e cos aki.” A haci un misa pa e hoben na Kapel di Alto Vista pa 6:30 atardi. Sr.Franken ta conta nos cu e hoben tabata tin su problemanan cu dokter y nan tabata hib’e Paaz pasobra e tabata un guy cu tabata scucha stem.

“E ta un guy cu no por a para keto pero e no tabata mishi cu niun hende ni mishi cu nada di niun hende. Mi no sa con e cos a bay y destino a ranca e asina ey for di nos.” E famia ta keda cu hopi fe den husticia pero awo despues di un aña nan kier sa kico ta kico. Sr. Franken ta conta cu e ta sinti su mes asina malo tur e temponan aki anto ningun hende a bin acerca e pa sikiera dun’e algun tipo di guia.

Casonan habri
Ministerio Publico ta bisa cu Aruba tin varios caso di asesino habri. Por ehempel e morto di Yellowman, haya kima den e cas bandona riba caminda pa molinanan di biento. Caso di e periodista Poentje Castro tambe, mata dilanti su cas. Segun vocero Ann Angela: “Un caso no ta verjaar. E famia por protesta libremente contra nos pero nos no ta contra nan. Nos ta cu nan. Nos tambe kier resolve e caso.” E caso di e hoben Franken pues ta keto bay bou investigacion. Algun luna pasa recherche a bisa e famia cu nan no a lubida di nan y cu nan ta riba e caso.

Kico a pasa cu Dyron
Dialuna marduga rond 2:13 riba 7 di maart 2016, polis ta haya un melding cu na altura di Noord 98 nan a scucha tiro. Na yegada di patruya nan ta haya un persona ariba caminda dilanti e cas y lo no tabata duna señal di bida. Tambe e persona tabata tin dos perforacion di bala. Mes ora nan ta constata y ta avisa cu tabata trata e hoben di 22 aña cu tin problema mental.

E area caminda e hoben aki a wordo asesina ta mustra algo bon hinca den otro, esta un area keto y scur cu sero chens cu un hende por a wak algo. Pues ta mustra claramente cu “nan” lo por a convence pa e bay eytras y asina likida e. Pero esey investigacion di parti polis tin di bay determina, kico exactamente a pasa. Dyron tabata hopi den noticia prome cu su asesinato, aunke su problema tin un rabo hopi largo. Varios biaha e hoben aki cu problema mental tabata wordo deteni pa polis, paso e lo a comete algo no bon. Di eynan e ta wordo hiba Paaz, caminda e ta haya un medicamento cu tabata traha pa algun dia, y manera cu e efecto pasa Dyron tabata hay’e bek ta haci cosnan negativo.

Segun polis, hopi nan a papia of miho bisa a avisa e instancianan concerni ariba e problema serio cu Dyron tin, pero nada tabata wordo haci di nan banda.