Awe mainta, Director di Banco di Seguro Social (SVb), Edwin Jacobs a splica durante un conferencia di prensa loke ta trata subsidio di salario di luna di mei y e condicion cu a wordo poni pa luna di juni.

Di esaki, el a expresa cu e programa di subsidio di salario ta usa como referencia e relacionnan di trabou registra na SVb dia 15 di maart 2020, cu tin e meta di mantene e cupo di trabounan di e dia ey durante e periodo di crisis, te na momento cu por logra trece economia riba pia y cu empresanan mester ta den condicionnan pa por cumpli cu nan obligacion.

Un programa cu Jacobs a afirma cu cada luna gobierno tin cu haci su peticion pa prestamo na Hulanda. Na e momento ey tin biaha cu nan ta cambia e condicionnan cu por ehemplo, lo aplica pa luna di juni.

Asina mes, el a manifesta cu esaki ta mantene salarionan sigura desde e fecha menciona caba, 15 di maart. Salario no lo cambia, sino cu lo keda fiho durante henter periodo di subsidio di salario.

Jacobs a sigura cu gobierno lo duna un aporte di maximo 60% di e salario di e trahado y e ta duna un aporte tambe pa cu e dunado di trabou den gastonan na momento cu tin un trahado den servicio. E 60% aki ta depende di e perdida di benta cu e compania ta premira cu lo tin na luna di mei. Den prome instante, e dunado di trabou tin cu haci su calculo y a base di loke ta indica SVb como instancia encarga di ehecucion di e programa aki ta duna un decision temporario den forma di un adelanto.

Despues di luna di mei, ora cu e datonan relevante – como declaracion di BBO cu keda entrega na departamento di impuesto – e departamento aki hunto cu SVb ta determina e perdida real di benta y ta bin cu un decision pa loke ta trata e peticion y subsidio pa luna di mei.

“E ta un programa cu ta evoluciona y cana na caminda” Jacobs a señala.

Di loke ta trata e condicionnan mara na e subsidio di luna di mei, e trahado pa ken e compania a ricibi subsidio tin derecho di mira e informacion specificamente di su persona pa loke ta e subsidio ricibi. Ora cu SVb a duna un decision provisorio di cuanto ta bay duna di adelanto, SVb a suministra pa dunado di trabou un lista di trahadonan inscribi na SVb dia 15 di maart, pa loke ta tabata trata su sueldonan diario, sueldo mensual. A base di esey a determina hunto cu e perdida di benta kico pa cada trahado a haya na subsidio pa salario (subsidio bruto) y for di esaki tin cu kita contribucion di trahado pa AZV, AOB y AWW, contribucion na e plan di pension general y tambe si tin cu paga loonbelasting. Banda di esaki un suma mas pa e dunado di trabou por paga su gastonan.

Jacobs a declara cu otro condicion ta cu e trahado pa ken e compania a ricibi subsidio durante luna di mei mester permanece den servicio di e dunado di trabou, igual cu mester permanece registra na SVb como trahado cumpliendo cu e ley di seguro di malesa y accidente.

Conforme cu e ley promulga den un decreto ministerial ta prescribi cu e dunado di trabou tin e obligacion di paga 60% di e salario contrata. El a splica cu den caso cu un persona tin un salario cu ta riba 5.850 florin pa luna, ley di SVb no ta cubri tur e sueldo. Ta sigura e sueldo pa malesa te cu 5.800 y pa seguro di accidente e ta paga te cu maximo 5.850, pa cu e ley di subsidio gobierno a bisa cu si e salario ta por ehempel 7.000 florin, e subsidio ta wordo calcula te cu 5.850 florin.

Pero ta importante pa menciona cu e salario cu tin cu wordo paga; ta bisa cu tin cu paga 60% si e salario cu a wordo contrata tin un diferencia cu e dunado di trabou mester pone si e trahado ta cobra e 7.000 ey, Jacobs a expresa.

E dunado di trabou tin e obligacion den luna di mei pa paga e prima di AOB, AWW y AZV na belasting, tanto e parti di dunado di trabou como esun di e trahado. Si no e por haya problemanan den siguiente luna. Asina tambe tin cu paga prima di seguro di malesa, accidente y pension general di trahado pa SVb.

Ta importante pa e dunado di trabou cambia e salario diario entrante 1 di juni conforme na locual el a paga na mei, e adaptacion di e sueldo aki no ta bay afecta e posibel sueldonan cu lo wordo usa den luna di juni of juli. Si durante e luna di mei un trahado ta bay AO, e compensacion di gastonan di malesa y accidente ta wordo calcula a base di e salario real cu ta ricibi, no e salario di referencia di luna di maart.

E resultado di e subsidio di salario te ayera 1 di juni, Jacobs a duna di conoce cu tabata di 3.232 empresa categorisa como empresanan vulnerabel y cu tin hopi chens di sufri un perdida di mas di 25%. Di esakinan pa luna di mei 1.647 a haci peticion pa subsidio di salario, 1.617 a haya e placa di subsidio. 30 empresa a haci e peticion pero no a ricibi e suma ainda, pa motibo cu 16 di nan ainda no por duna SVb un cuenta di banco na unda por haci e transferencia.

Un total di 27.207 trahado a bin na remarca pa ricibi e subsidio aki, cu un total di 44.9 miyon florin cu a wordo paga pa empresanan cu e subsidio di salario.

Pa luna di juni, Jacobs a specifica cu pa haya subsidio di Hulanda, a pidi nan un condicion, esta cu e trahado mester acepta e entrega di 20% di salario, pa loke nan ta bay pidi pa e luna aki un lista di trahadonan y tur di nan mester firma cu nan ta bay di acuerdo cu e 20%. Si un trahado so di e compania no ta di acuerdo cu esaki, e compania no lo bin na remarca.