E hecho cu un suma astronomico di alrededor di 1.6 biyon florin no a wordo paga na belasting for di sector priva ta digno di investigacion, segun Sindicato di Aduana di Aruba (SADA).
Pa presidente di SADA, Edward Maduro, mester bin un manera pa evita cu cos manera esaki ta sucede den futuro. Si aworaki por ehempel Aruba tin un debe nacional di 5 biyon. Mientras cu di otro banda pais Aruba tin alrededor di 1.6 miyon florin di belasting cu no a drenta den caha di gobierno, ya cu nan no a wordo paga. Pa SADA esaki ta inaceptabel.
Maduro a referi tambe cu –segun declaracion di prome minister– hopi di e debe aki practicamente a caduca, y mester busca e manera pa haya algo bek. E ta haya cu situacion manera esaki ta pone cu awor pais Aruba ta manera nos ta. Pasobra tur gobierno no a percura pa tur e placa di belasting, cu ta un obligacion ciudadano, por a drenta na caha di gobierno.
“Esaki pa nos ta un punto di preocupacion hopi grandi,” el a bisa. E no kier imagina cu aki un par di aña pais Aruba lo confronta un situacion similar di un crisis, y ademas cu mas debe y belasting cu no a wordo paga.
Mientras cu desde cu gobierno a sinta nan a anuncia cu nan kier bin cu un Camara di Integridad. Pero practicamente 3 aña a transcuri y ainda e Camara di Integridad no a bira realidad. Tur esaki – segun Maduro – tin di haci cu e tema di corupcion.
SADA a referi cu varios caso interno mes den departamento di Aduana, posiblemente tin di haci cu corupcion. Pero te dia di awe gobierno no a haci nada pa atende nan. Maduro ta haya cu nan puntonan cu awor Hulanda ta wak cu cierto cosnan mester tuma luga, y actividad proactivo di parti di gobierno, pa contraresta e tipo di corupcion aki.
