​No tur trahado di Aura casino a bati porta di DPL pa busca trabou

No tur trahado di Aura Casino a bay registra na Departamento di Progreso Laboral (DPL) pa busca ayudo pa un trabou nobo. 

Vocero di DPL, sr. Richenel Stamper a declara na Bon Dia Aruba cu cualkier compania cu ta cera y hendenan ta keda sin trabou, nan mester bin registra nan mes pa asina DPL lo por yuda nan. “Si bo no ta bin akinan nos no por yuda bo”, el a bisa. 

E ta haya cu esey ta esencia di tur cos. Ya cu si nan no ta bin registra, nan no por bisa despues cu DPL no a yuda nan, pasobra DPL no sa cu abo no tin trabou.

Den cifra sr. Stamper no sa precisamente cuanto di e trahadonan di Aura Casino a registra. Tin algun di nan cu a bini y nan a wordo atendi. Actualmente algun di nan ta den proceso pa haya un entrevista na diferente compania.

Sin registracion no tin ayudo   

E ta haya cu tin biaha e problema ta sinta cu hopi di e hendenan cu a perde su trabou no ta bin DPL pa informa. Y esaki a sosode cu algun trahadonan di Aura Casino, ya cu no tur a bin realisa nan registracion debido cerca nan. E ta haya un lastima ,ya cu si e trahado no ta registra dificilmente nan  no por yud’e

Nan tin algun trahado di Aura Casino registra, y actualmente nan ta den proceso pa wordo entrevista. Esaki ta un proceso cu –segun vocero di DPL- ta andando. Ya cu manera e mesun mandatario di Labor a bisa, esaki ta un di e metanan di DPL pa hende cu ta haya su mes sin trabou por wordo yuda pa haya trabou. Sr. Stamper a bisa cu e servicio aki ta gratis caminda unabes cu e trahado desemplea ta keda registra, nan ta cuminsa busca vacatura disponibel riba mercado laboral pe.

Un aspecto cu segun vocero di DPL mester tene cuenta cun’e tin di haber cu den e caso di e trahadonan di Aura Casino, cu no ta asina cu tur casino na Aruba na e momento actual ta buscando hopi hende. El a splica cu eventualmente e trabou cu e persona desemplea ta buscando net e trabou ey posiblemente no tin vacatura aworaki. Den caso asina e persona mester ta dispuesto pa haya algo similar of den e mesun direccion.

“Esey tambe ta keda na e responsabilidad di e persona mes pa tuma e decision”, el a bisa. Sr. Stamper a indica cu DPL ta haci esfuerso si pa e persona desemplea si por haya e posibilidad pa haya un trabou.

Job fair 

Aunke DPL no ta participante directamente den un encuesta laboral, si nan ta contribui cu loke nan mester. Igualmente  nan tin pensa pa bin proximamente cu un actividad masivo pa yuda esunnan desemplea pa haya trabou. 

DPL ta trahando aworaki riba un proyecto pa organisa un Job fair nacional caminda tin hende na Aruba cu no tin trabou of cu tin trabou, pero ta buscando algo miho pa busca trabou pa nan. Tambe ta e caso di persona cu ta traha bou contracto cu ta bay termina y cu ta buscando un sitio pa den futuro bay traha, pa participa gratis den e Job fair aki. 

E Job fair aki lo ta un escenario ideal pa haya tur dunado di trabou na Aruba presente, caminda e trahado lo por aplica y haya tur sorto di informacion entre otro unda tin vacatura y nan existencia.

“Tur dos partido (dunado di trabou y trahado) ta bin hunto riba un solo dia “, el a bisa. Fei di awor e ta haci un yamada na tur dunado di trabou pa keda na expectativa di e job fair aki cu ta na caminda pa nan participa y haci e posibilidad di esun cu ta bay solicita pa un trabou mas grandi. 

DPL lo t’ey pa compaña e trahado cu informacion al caso riba buscamento di trabou. Intencion ta pa trece mas hende posibel na e mercado laboral. ‘Pa nos e no ta bay ken ta duna trabou, pero mas hende cu ta haya trabou ta miho pa nos”, el a bisa.

Den dianan cu ta bini ora cu vocero di DPL lo tin mas informacion concreto, nan lo publica nan debidamente y den forma masivo haciendo uzo di medionan digital tambe.