Gobierno no a transferi placa di su presupuesto pa salvaguardia e fondo di pensioen di behes administra pa Banco di Seguro Social (SVb). E fondo aki tabata dispone di medionan ainda prome cu a bin cu algun ahustacion, asina director di SVb, sr. Edwin Jacobs a declara na Bon Dia Aruba.
El a indica cu -segun proyeccion di 2013- si no tabata haci nada te cu aña 2015, e fondo su recurso lo presenta problema. Pero esaki no a sosode ya cu te cu aña 2014 tabatin recurso financiero pa paga e pensioen.
Den caso cu si tabatin deficit durante 2015, gobierno mester a contribui, pero esaki no tabata necesario ya cu ahustacionnan a wordo haci na tempo a evita cu e deficit no a wordo presenta. Por lo tanto no tabata necesario pa Gobierno contribui directamente na e fondo, el a laga sa.
Tin ehercicionan cu a wordo realisa pa fortalece e fondo di pensioen di behes, entre nan hisamento di edad gradualmente di 60 pa 65 aña y aumento di prima. Pero riba inyeccion financiero di gobierno di su presupuesto den e fondo aki, nunca esaki a sosode.
“Gobierno no a inverti di saca placa di dje mes pa e fondo di AOV, ya cu esaki ta bin di prima”, director di Banco di Seguro Social (SVb), sr. Edwin Jacobs a declara na Bon Dia Aruba.
Reparatie toelage
Locual si nos por a mira ta cu na 2010/2011, gobierno a introduci un compensacion apart pa e pensionadonan di AOV na Aruba, loke ta wordo yama como reparatie toelage.
E aña aki e reparatie toelage a yega na alrededor di casi 23 miyon florin cu Gobierno a saca di su presupuesto. E placa aki a wordo transferi na SVb pa e pensionadonan cu ta haya 100 florin extra tur luna riba nan pensioen di behes.
Sr. Jacobs a bisa cu esaki ta un contribucion directo di Gobierno na e pensionadonan. Tambe como doño di trabou, Gobierno tambe ta paga prima cumpliendo cu su empleadonan publico. Te cu na september tur debe Gobierno riba prima ta regla y actualmente tin un debe, pero esaki ta un proceso continuo di cada tres luna cu nan tin cada cierto tempo, y nan ta ahusta e suma aki.
Esaki kiermen cu ya sea SVb ta haya di mas of e ta haya di menos fei Gobierno pa cu e pago di prima di su empleadonan. Por ta cu actualmente tin prima atrasa pero no di añanan atras, ya cu te cu september nan tabata “clear”, kedando pendiente e tres luna despues, sr. Jacobs a aclaria.
