Riba e proyecto di desaroyo di un proyecto di eco-turismo na Isla di Oro, minister di Turismo Dangui Oduber (MEP) ta considera cu esaki lo yuda eleva e calidad di e producto turistico cu nos ta ofrece na nos bishitantenan.

“E ta algo. E ta fit den e vision cu nos tin como gobierno pa eleva e calidad cu nos ta brinda na e turistanan”, el a bisa na Bon Dia Aruba. Gobierno di Aruba ta kere den tipo di proyecto asina cu ta diversifica di producto y acomodacion cu nos ta brinda na e turistanan.

Un di e problemanan cu tin aworaki cu e proyecto aki ta cu nan a sinta cu e inversionistanan ta cu mester cambia e ROP (Ontwikkelingsplan). El a bisa cu su colega di infrastructura ta bezig cu e cambio aki, pero e ta un proceso largo. “Pero manera e cambio di ROP tuma luga mi ta kere cu e proyecto aki por continua”, segun minister di turismo.

E ta haya cu e proyecto aki ta uno atractivo ya cu ta algo nobo na Aruba y cu masha poco destinacion den Caribe tin e tipo di proyecto aki. E area tambe lo wordo protegi y conserva pa e medio ambiente no lo wordo elimina. Igualmente el a laga sa cu e barionan di Pos Chikito y Savaneta no tin nada contra pa e proyecto aki continua. Pues practicamente nan ta sperando e cambio di ROP pa e proyecto aki por inicia.

Ex-Bushiri hotel
Pa loke ta trata e anuncio cu e mandatario aki a haci cu lo bin cu construccion di un boutique hotel, caminda antes tabatin ex-Bushiri hotel, nan ta reconsidera si lo ta exactamente unda antes tabatin e edificio aki cu a wordo basha abou.

Despues cu un encuesta realisa pa un emisora a mustra cu mayoria ta na fabor di conserva y embeyece e area aki den su forma natural manera e ta, e mandatario ta evaluando e situacion aki. Nan ta evaluando pa wak kico ta e miho ubicacion pa e hotel y no necesariamente e mester bin caminda ex-Bushiri hotel tabata ta.

“Sigur nos ta evaluando unda nos ta bay posiciona e boutique hotel, pasobra e mester bira un plan integral den e desaroyo cu lo bay tin ariba e area di waf.” Pues e kiermen cu no necesariamente e boutique hotel lo pone esaki caminda ex-Bushiri tabata ta. Pero tin e posibilidad pa bin cu e proyecto aki riba tereno di APA y asina mantene e area aki totalmente habri.

Intencion ta cu e desaroyado di e proyecto aki gana e destaho pa bin cu un desaroyo hotelero pa asina desaroya e area caminda Bushiri hotel tabata ta, pero tambe pa haci un facilidad publico bon condiciona cu bañonan, restaurant, etc., cu famianan y comunidad di Aruba por haci uzo di dje.