(AP) – Un show grandi y popular di tecnologia wireless a cuminsa na barcelona dialuna, aunke no cu e mesun cantidad di personanan permiti pa atende e feria, y medidanan di salud y siguridad hopi mas estricto, cual ta cambionan cu ta refleha e realidad nobo pa e convencion nan di e industria den e era di pandemia aki.

Mobile World Congress a ser cancela na ultimo momento aña pasa pa motibo di preocupacionnan tocante COVID-19. E acto di trece e feria aki bek den aña 2021, ta haci cu el a bira un di e tiki shownan te awo cu a purba di haci un regreso, aunke e pandemia di coronavirus te ainda ta presente den hopi parti di mundo.

E show, tambe conoci como MWC, tipicamente ta un show di hopi fanfaria y hopi atendi pa varios persona, cu companianan di tecnologia grandi poniendo booth extravagante pa revela nan aparatonan mobil mas nobo of recien, clientenan di hopi importancia y te hasta oficialnan di gobierno. Pero e aña aki, e show di industria mobil mas grandi den e mundo ta mustra di ta un sombra di loke e tabata antes.

“Obviamente, lo tin un diferencia hopi grandi cu e ananan anterior. E aña aki e show lo bay ta hopi mas chikito, y hopi mas sigur den e perspectiva di salud y siguridad.” Mats Granryda bisa, director general di GSM Associaton, cual ta organisa e show y ta representa mas cu 750 operadornan di rednan mobil.

“Nos ta tumando hopi precaucion. Nos ta test tur hende regularmente cada 72 ora y tur cos ta sin contacto corporal.” Granryd ta agrega.

Toch, companianan manera Ericsson, Nokia, Intel, Sony y Qualcomm ta manteniendo un distancia, mientras cu Sur Korea su Samsung, e compania mas grandi di telefon mobil, lo ta lansando un aparot virtualmente. Gigante tecnico Chino Huawei, cual ta un sponsor grandi di e show, ta un di e tiki nomber nan grandi cu lo tin un booth fisico na e show.

Granryd ta premira di ricibi entre 25,000 pa 30,000 persona di 143 diferente pais, cual ta un fraccion di e 100,000 persona di 200 diferente pais cu usualmente tabata atende e show aki den añanan reciente.

Otro personanan tambe lo atende e show kai, pero birtualmente, manera un tercer parti di e presentadornan di e show, incluyendo Elon Musk di Tesla.

Na Barcelona su centro di exhibicion Fira Gran Via, lo tin trahadonan cu lo control e temperatora di e personanan cu atende e show aki na e entrada. Otro medidanan di siguridad ta inclui un test di COVID-19, extra ventilacion y rutanan di un solo via den e sitio. E personanan cu atende e show mester usa un aplicacion official di MWC pa por mustra e resultado negativo di e test di covid cu mester pa por drenta.

“Mi prome impresion ta cu mi ta hopi contento di por regresa” IOT Factory su CEO Lionel Anciaux a declara. Anciaux a comenta cu usualmente e ta atende tur aña, y “ultimo aña sin e Mobile World Congress nos a sinti cu algo tabata haci falta den area di descubri e tendencianan nobo den e mundo di tecnologia y forma partnernan nobo.