E situacion rond di e refineria bou maneho di Citgo, eventualmente lo bira un asunto cu lo demanda atencion na 2018. Mediador di gobierno, Anselmo Pontilius a declara na Bon Dia Aruba, cu ya caba e sindicato IOWUA (Independent Oil Workers Union of Aruba) cu ta representa e trahadonan den e refineria, a pidi un reunion cerca dje.
Na prome luga nan ta pidi e reunion aki, ya cu e sindicato ta representa un grupo di trahado cu ta cay bou un compania cu ta brinda servicio permanente den e refineria, y nan trahadonan ta miembro di IOWUA.
El a informa cu ya caba nan a tene un reunion hunto cu IOWUA y e compania contratista. Den e reunion aki a sali na cla cu si kier resolve e diferente punto cu e sindicato a trece dilanti, lo ta ideal pa nan tin gerencia di e companianan Citgo y RdA. Esaki pa motibo cu tin cierto acuerdo di pago cu nan ta haci na e contratista. Ya cu e contratista ta bisa cu si no ta bin cambio riba e forma di pago, dificilmente nan lo por cumpli cu e exigencianan di e sindicato.
Mas claridad
E prome peticion ta esun di trata di bin hunto cu tur e partidonan envolvi na mesa. Pero na mesun momento IOWUA a propone pa mediador di gobierno trata di haya un reunion tambe cu e compania Citgo pa sa exactamente con e trabou lo sigui pa 2018. “Considerando cu loke ta bin pasando na Venezuela ta di noticia publico, cu PDVSA no ta pasando den su miho momentonan.”
Sr. Pontilius ta haya cu e solicitud aki di IOWUA lo ta otro parti. Na e momento aki, nan ta bay atende e capitulo den cual e sindicato kier negosha condicionnan di trabou pa un grupo di trahado cu a bira miembro di nan y nan ta traha pa un contratista. Pero nan kier clarifica cu Citgo, ya cu e ta e empresa cu ta duna e trabou. “Si bo no ta clarifica e punto aki dificilmente cu nan lo por sali fei e parti financiero”, segun sr. Pontilius.
E ta spera cu den transcurso di e proximo simannan e reunion aki lo por tuma luga. Ya cu den todo caso mester clarifica cu Citgo, specificamente con e trabou lo bay sigui pa aña 2018. E ta un tema importante pa gobierno tambe por tin un claridad y sigur sindicato tambe. E ta supone cu gobierno mes den e proceso aki ta tratando di haya claridad. Tin un acuerdo manera tur hende sa di Citgo cu pais Aruba y ta importante pa sa con e acuerdo aki lo bay sigui. Tambe ta conoci cu tin retraso riba e trabou cu mester wordo haci pa reanuda operacion di e refineria.
