“Gobierno no a duna permiso pa construi na Isla di Oro”

E construccion di un hotel na Isla di Oro atrobe ta den boca di pueblo. Segun Prome Minister Mike Eman, al contrario di loke algun medio di comunicacion a publica, ningun decision a cay ainda en cuanto ta construccion di un hotel na Isla di Oro.

 

“Nos a sinta cu Sr. Greg Peterson pero tambe cu mas NGO’s anto nos a defini 16 area di naturalesa nobo cual nos ta bay proteha mescos cu nos Parke Nacional Arikok. Esey naturalmente ta algo cu ta importante anto mi ta hopi orguyoso cu ta un gobierno di nos mesun signatura na aña 1994 a decreta Parke Nacional Arikok, mirando cu awo nos tin e oportunidad atrobe pa 16 area y nos duinnan te cu nos mangelnan cu nos por decreta tambe den e forma aki,” Prome Minister ta splica Bon Dia Aruba. Den e areanan specifico aki no lo ta permiti pa construi anto den e forma aki ta conserva partinan importante di nos naturalesa pa nos futuro generacion. 

 

Segun Prome Minister Mike Eman, pa gobierno e ta importante ora bo tin sitionan manera Isla di Oro, pa decisionnan wordo tuma cu ta naturalmente tene e balans entre oportunidadnan economico pero tambe con bo ta sigui cuida nos medio ambiente. “Den caso specifico di Isla di Oro, no a duna permiso pa construi. E propietarionan a cumpra e luga anterior cu tin eynan y a presenta un plan cu segun nan, e forma cu nan ta construi no lo haci daño na e naturalesa,” Prome Minister ta comenta, agregando cu e ta keda na expertonan tanto di NGO’s como gobierno pa finalmente tuma un decision si realmente bo por haci un desaroyo eynan cu minimo efecto of si ta posibel pa construi den e area aki mes sin haci ningun daño na e flora y fauna. 

Tin hopi cos cu a sali den medionan di comunicacion pasobra esunnan cu a cumpra e propiedad na Isla di Oro a cuminsa mobilisa eynan sin permiso di gobierno.  Prome Minister ta enfatisa cu gobierno al contrario a bisa tur hende wanta pa studia prome kico por ta e impacto pa e naturalesa versus e interes di e desaroyadonan pa haci algo cual por ta un contribucion pa un sitio mas atractivo cu Aruba por ofrece. Segun varios NGO’s a pone bon cla caba, cualkier tipo di construccion cu wordo haci na Isla di Oro ta bay tin su efectonan na medio ambiente y ta pa e motibo aki ta sugeri pa laga e luga aki para anto haci di dje un otro tipo di atraccion turistico mirando cu e ta bay forma parti di Parke Nacional Arikok como area protegi. 

Segun  NGO’s cu ta contra e proyecto aki, e area no mester di un hotel cual lo trece continuo problema cu ne mirando cu ya caba a wordo menciona cu lo spuit veneno pa mata e sanguranan pero esaki lo bay afecta tur otro organismo cu ta crece y biba eynan.  Ainda no tin ningun cifra of rapport cu ta detaya kico tur ta bay wordo haci anto e impacto cu esaki por trece cu ne. Prome Minister ta bisa: “E ta un decision delicado pero e ta bay wordo tuma adecuadamente.

E publicacionnan cu a sali bisando cu ya e decision a cay no ta corecto”

 

 

 

Cambio den R.O.P.

Tin par di aña caba cu ta den proceso pa haci cambio den e R.O.P. (Ruimtelijk Ontwikkelings plan) cual segun minister di Infrastructura, no ta cambionan cu lo bay trece hopi cambio den e R.O.P. actual.

“Ta cambionan cu nos ta mira mas pa e parti di vivienda, partinan cu a wordo declara “Natuurgebied”

den cierto areanan di vivienda cu nos ta kere cu no mester ta asina pero ta cambionan chikito,” Minister Benny Sevinger ta splica Bon Dia Aruba. E cambio grandi mes den e R.O.P. lo bin na 2019 unda cu lo revis’e completo. Locual gobierno ta propone aworaki ta cambionan chikito cu nan ta constata cu ta limita e decisionnan cu nan tin cu tuma riba diferente asuntonan. Minister Sevinger ta bisa: “Nos ta den combersacion cu diferente partnernan, kiermen e ta un proceso pa cana conforme ley pues no tin un periodo cu bo ta bisa cu tal dia e ta bay keda cla. Pasobra nos no sa con e discusionnan ta bay cana of kico ta e cambionan cu lo tin pero en todo caso nos a start e discusion y esey ta importante.”