Claridad encuanto Citgo y PDVSA birando mas urgente

Recientemente nos a dedica un editorial na e situacion encuanto PDVSA, Citgo Merca y Citgo Aruba. A señala cu gobierno lo mester busca pa sa mas pronto posibel kico ta e actual situacion pa cu e proyecto di rehabilitacion di e refineria hereda di Valero, en bista di e problemanan grandi den tanto Citgo Merca como den PDVSA. E desaroyonan desde ayera ta subraya e urgencia aki mas fuerte ainda. E noticia mas impactante ta e aresto ayera di henter e top Venezolano di e compania Mericano Citgo Petroleum na Houston, cu tabata den su totalidad na Venezuela, supuestamente pa consulta cu e empresa madre PDVSA.

E fiscal general nobo nombra pa e asamblea constituyente estilo Cubano di Nicolas Maduro mes ta dirigiendo e operacion, cu pa mas di un motibo ta remarcabel. Pa cuminsa e accion aki a pone fin na un epoca unda tur caso di corupcion grandi relaciona cu PDVSA por a conta cu e rechaso tahante di gobierno Venezolano, alehando cu ta trata di ‘intento imperialista di mina e revolucion Bolivariano’ Manera den e caso di e famoso José Roberto Rincón, no desconoci na Aruba, condena na varios aña di prizon na Merca. Of e igualmente famoso ‘Pollo’ Carvajal cu tabata practicamente biba na Aruba, mientras Merca tabata busk’e pa narcotrafico y labamento di placa. Asina tambe e caso di e ‘narcosobrinonan’ di e pareha presidencial, cu tabata uza e rampa presidencial na Maiquetia pa nan envionan di droga pa Merca. Pero tur esey por a conta cu e furia di e presidente en persona.

E hecho cu awor Maduro y su hendenan a cuminsa un guera contra Chavista cu nan mes a nombra den e top di Citgo, acusando nan di robo di propiedad di e compania, traha contracto delictivo cu contratista, labamento di placa y participa na un organisacion cu meta delictivo, ta indica cu algo serio ta pasando. Pakico diripiente e cambio di maneho aki? Esey tin probablemente hopi di haci cu e situacion grave financiero di tanto PDVSA, Citgo y gobierno di Maduro mes. Si un pais ta biba di petroleo so, ta pa 96% di su divisanan dependiente di un solo empresa, anto ora e empresa ey kibra, o miho bisa, e Chavistanan desde nan take over na 2002 a logra gradualmente kibra e compania, ta henter e pais ta bay bao awa hunto cu ne. Ta imposibel pa gana tanto placa pa un compania haci mantenemento, sigui inverti pa futuro manera ta normal den negoshi di petroleo, paga pa tur importacion di henter e pais, mantene un payroll cu ta tres biaha mas grandi cu normal, mantene henter e gobierno corupto di Maduro y su hordanan socialista, y riba esey permiti robo di miles di miyones pareu di hende pega na e regimen. Si Venezuela tabatin un Exxon Mobile, tambe lo nan a logra kibr’e…

Otro noticia cu a capta nos atencion ayera, cu tambe ta aparece den e edicion aki di nos corant, ta cu cierto contradiccion entre Citgo na Merca y PDVSA a cuminsa sali na cla. Citgo, cu normalmente ta un di e receptornan grandi na Merca di crudo Venezolano, ultimamente no ta hayando ni mita di loke nan tabata ricibi. Esaki parcialmente pa e medidanan tuma pa gobierno Mericano pa sanciona regimen di Maduro. E otro berdad ta cu PDVSA no tin mas pa entrega tampoco, ya cu mester duna prioridad na e entrega di crudo na tanto Rusia como China, cu a paga caba den forma di prestamo den dollar. Y awor, PDVSA a tuma e medida di obliga un di e empresanan di joint venture cu ta opera un di e upgradernan cu ta procesa crudo di Orinoco, pa entrega crudo na Venezuela mes, den un intento pa tene e refinerianan local na bida. Logico, pasobra e pais lo bira un caos sin acceso na gasolin y diesel. Cu consecuencia cu Citgo ta bay keda sin suministro di crudo mehora di Venezuela, loke ta obliga e compania Mericano pa cumpra crudo na Merca mes, pero aki tin otro problema: Citgo ta asina mal para financieramente, pa descapitalisacion na man di e mesun regimen delincuente Venezolano, cu nan tin problema pa cumpra crudo na Merca, pasobra nan no por paga cash.

Ta parce cu na e pais bisiña e caos ta aumentando di tal forma, cu e delincuentenan ta cuminsa yama otro pa corupto. Anto net na un momento cu Maduro a logra laga oposicion tur confundi despues di e derota, cu fraude of no, den eleccion pa gobernador. Presidente Maduro por manda otro hende Merca pa tuma over mando di e compania, pero lo tin problema pa logra cu nan ta drenta e pais, te haya permiso pa traha. Di tur manera ningun gerencia por cambia e rumbo negativo, ni na Venezuela, ni na Merca.

E pregunta na Aruba ta, kico nos ta bay haci, confronta cu tur esaki, den un proyecto aki, mas basa riba promesa confuso cu riba hecho real, cu den e proximo añanan lo mester tabata nos salbacion economico? Banda di e claridad necesario, miho nos cuida loke si nos tin y cu nos sa cu ta produci: turismo.