Sindicato IOWUA ta urgi reunion cu tur partidonan
Te aworaki Citgo Aruba ta cumpliendo cu e pago y prestacion di un grupo di trahadonan cu ta trahando directamente den e refineria. Sinembargo e situacion aki no ta mescos pa e contratistanan cu tin trahadonan cu ta labora indirectamente den e refineria. Nan tin dificultad pa cumpli cu nan compromiso di salario, ya cu Citgo no ta cumpliendo cu pago pa nan tur.
Presidente di Independent Oil Workers Union of Aruba (IOWUA), Boy Anthony a declara na Bon Dia Aruba cu tin un grupo di alrededor di 81 trahadonan cu ta traha directamente cu Citgo y cu nan ta afilia na e sindicato aki, cu hayando nan pago di nan salario na ordo. E ta referi na e trahadonan di e terminal y di e refineria na servicio directo di Citgo Aruba.
Pa loke ta e contratistanan nan realidad ta otro. Nan ta hayando contratiempo cu nan pago. Sr. Anthony a laga sa cu como sindicalista cu tin e clase trahadonan central, ya sea cu nan ta afilia of no na e sindicato, IOWUA a mustra nan solidaridad y te hasta a purba di yuda nan te hasta unda nan por, ya cu e sindicato aki ta representa e trahadonan cu ta traha directamente cu Citgo. IOWUA no ta representa contratistanan.
Sr. Anthony a intermedia y papia cu gerencia y cu e doñonan di dos compania contratista pa asina nan por haya nan pago y cumpli cu e trahadonan. “Bo tin bo debenan, bo tin bo gastonan y mester come. Y si mi a traha mi kier wordo paga.”
Reunion cu gobierno
Mirando e incertidumbre actual rond di e futuro di e refineria, IOWUA a reuni cu Mediador di Gobierno, y tambe a sinta cu minister di Labor, Glembert Croes pa wak con nan por sinta cu Refineria di Aruba (RdA) y Citgo mes pa aclaria e problemanan cu tin. IOWUA como sindicato kier sa con nos ta para, ya cu aworaki ‘basicamente ningun hende sa kico ta bay pasa’. Nan lo kier sa si e trabou ta bay sigui pa restart e refineria of e proyecto aki ta bay cay den un receso pa largo tempo. E sindicato aki ta mesun leu cu tur hendenan afo -te hasta gobierno nobo mes- rond e situacion di e refineria na San Nicolas.
IOWUA a yega di expresa nan preocupacion cerca e minister en cuestion, ya cu nan ta wak cu no tin un control di parti di labor. Ya cu si nos tin un ley di labor cu ta stipula kico e dunadonan di trabou mester paga riba dianan di fiesta y dianan liber y cu tur trahadonan tin derechonan na Aruba, y si tin dunadonan di trabou cu no ta cumpli cu esaki y no tin control, practicamente nos no tin nada. “Ki bal bo tin un ley si bo no tin control.” E ta haya cu e situacion aki no ta algo nobo sino cu a existi semper. E sindicato aki ta boga pa bin cu un reunion structura cada kwartaal entre tur partner envolvi cu asunto di refineria y terminal pa mantene un bon comunicacion.
Recientemente, IOWUA a manda un carta pa gerencia di Citgo pa duna e trahadonan un splicacion di kico ta pasando y cual ta e situacion real riba e futuro di e refineria. E contesta cu nan a haya na nan e-mail ta cu ora nan ta asina leu gerencia di Citgo ta bay informa nan. E sindicalista a bay den pasado tempo cu Valero tabata negosha cu Petro China, caminda un 99% tabata garantisa cu e refineria ta bay habri y cu e compania ey ta bay cumpra. Sinembargo un 1% a resulta e berdad ya cu Petro China no a cumpra y e refineria no por a habri e tempo aya. Aworaki nan ta positivo, pero masha cauteloso y realistico. Nan ta wardando un feedback di gerencia di Citgo riba kico ta bay ta e proximo paso.
Incertidumbre
Segun e sindicalista aworaki ta wordo papia di un ‘slow down’, kiermen cu e proceso ta bay mas poco poco. Si e slow down aki ta pa un par di luna, e no ta haya problema. Pero mester tene cuenta cu e contratistanan y tambe cu e operacion di e terminal cu mester keda existi ya cu nos isla mester abastece su mes di gasolin, diesel y jet fuel.
Un preocupacion cu ta keda ta e refineria. E ta puntra su mes: Kico ta bay pasa cu esaki? Ora cu sr. Anthony ta mira kico ta pasando di berdad, e panorama aki ta pone su persona duda. Ya cu e deal of acuerdo cu nan a firma y e forma con esaki a wordo hinca den otro, tabata mustra bon. E ta haya cu e acuerdo tabata mustra atractivo pa Aruba y e trahadonan, y te hasta nan mes a apoya e acuerdo aki ‘all the way’ leu di politica. “Ami a hay’e bon. Y e echo cu gas y tur otro cosnan, ma apoya.”
Pero despues a bin e scandal di e directornan y ehecutivonan grandi di Citgo cu a bay cera pa mal maneho y tur cos a cuminsa cambia. Tambe den prensa a cuminsa sali e cantidad di debenan cu nan tin internacionalmente.
Ta asina cu ora el a yega di sinta cu gerencia di Citgo, e sindicalista a bis’e cla y raspa cu si contratistanan mes nan no ta cumpli, con nan ta bay cumpli cu un proyecto asina grandi. Pero tambe ken ta bay financia nan? Sinembargo na e ocasion ey, gerencia di Citgo a bisa e sindicato cu nan tin e garantia cu ta bay haya e financiamento pa restart e refineria. E ta haya cu como sindicato nan tin cu duna Citgo e beneficio di duda, pasobra tambe diferente partidonan politico a confia riba e proyecto aki, pasobra e tabata algo positivo y nos pais no por depende riba turismo so.
Te hasta unda IOWUA su pasenshi ta bay yega rond di e situacion di incertidumbre actual di e refineria? Sr. Anthony a laga sa cu nan a manda un carta pa gerencia di Citgo pa atende diferente asunto. Pa medio di e carta aki nan tin un prueba. Ademas nan a sinta cu Mediador di Gobierno y tambe cu minister di Labor a base di un invitacion cu e mesun mandatario a formula cerca nan.
Diabierna ultimo, IOWUA tabatin pensa di manda otro carta como recordatorio pa tur instancia atende cu e asunto aki. Nan ta spera cu entrante e siman aki nan por haya un contesta. E prome paso ta sinta na mesa pasobra e ta haya cu solucion ta na mesa pa sa kico ta kico, ya cu asina aki nan no por defini nada. Tampoco nan no ta kere cu accion ta bay yuda mucho pa atende debidamente cu e situacion aki. IOWUA kier ta parti di e solucion hunto cu tur partido, pero a base di transparencia.
Gobierno y Citgo
Te ainda gobierno ta den un situacion di status quo, sperando mas informacion di parti di Citgo riba panorama di e refineria. Nan a manda un recordatorio y nan ta spera un contesta di parti di Citgo.
Siman pasa prome minister, Evelyn Wever-Croes (MEP) a laga sa cu a pesar di e situacion di e blokeo di e gobierno Venezolano, y considerando cu Citgo cu ta un filial di PDVSA ta encarga cu operacion di e refineria nacional na San Nicolas, gobierno di Aruba sa cu Citgo kier pa Asdrubal Chavez, kende ta presidente di Citgo awor, bin haci un bishita na nos isla. E prome mandatario di Aruba a bisa cu prome cu nan ta sostene un reunion cu gobierno di Aruba, nan kier wak compromiso riba papel pa wak unda nos ta para.
Di su banda, minister di Labor, Glenbert Croes (MEP) a bisa cu nos no ta bay acepta cierto practica cu a wordo constata cu ta tumando luga di cierto trahadonan cu ta bin di afo y nan ta keda tres luna trahado, mientras cu nos tin hendenan local cu por haci e trabou aki den e refineria. “E ta un practica cu ta tumando luga y cu nos no ta bay acepta”, segun e mandatario. A base di indicacion aki nan lo bin cu cierto anuncio relaciona cu e maneho aki.
