Tin un aviso pa calor excesivo cu lo ta valido te cu dia 6 di juni. Un gradiente di presion abao causa pa un disturbio den diferente nivel di atmosfera lo produci un biento zwak di direccionan varia. E caracteristica aki lo perdura pa algun dia te na ora e disturbio kita for di caribe.
E calor y humedad halto lo no baha mucho anochi cu temperatura bahando solamente te un minimo di 27/ 28 grado, esaki lo aumenta e peligro pa hendenan cu no por haya un luga adecua pa refresca nan curpa.
Calor excesivo ta e asesino di tempo nr. 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu ta malo di curason ta esunnan mas expone. Limita actividad pafo di cas pa oranan trempan di mainta of ora solo baha. Si bo tin un airco huzele of a lo menos habri bentana pa laga aire pasa i circula.
Anteriormente, DVG a informa pueblo di e fenomeno aki cual tambe ta conoci como un heatwave. Den e comunicado aki Departamento di Salud Publico ta conseha comunidad pa durante e dianan cu ta sigui pa bebe hopi awa por lo menos 2 liter pa dia, uza protector solar SPF 30 of mas, bisti bril di solo, pechi of sombre, paña di color cla preferibel di catuna of linen y evita bebida cayente y bebidanan cu ta contene cafeina of hopi sucu durante e oranan mas calor cu ta entre 11:00 di merdia pa 2:00 di atardi.
Lamentablemente diabierna mainta a drenta informe di un persona cu trahando riba trapi lo a bira malo y a sak den otro na un condominio den construction na Opal. Mesora a dirigi tanto polis como ambulance na e sitio. Na yegada di e patruya ya ambulance tabata na e sitio caba y tabata tratando di reanima e victima, kende lo a haya un ataca. Despues di varios intento sin resultado a stop y a pidi pa dokter presenta na e sitio.
Nos muchanan, enfermonan , empleadonan di construccion y nos hendenan grandi ta esunnan mas vulnerabel pa e calor aki. Ta hopi importante pa vigila nan constantemente y refresca nan curpa pa wanta e temperatura abao y hidrata nan cu suficiente likido pa evita un posibel heatstroke, cu ta un condicion hopi delicado caminda cu e curpa ta stop di soda. E temperatura di curpa ta sigui subi mas cu 40° grado Celsius y ta perhudica e centro di control cu ta regula e temperatura corporal den nos celebro.
Sintomanan di un heatstroke ta:
Temperatura corporal halto den corto tempo
Cara y cuero cora y seco
No ta soda mas
Curazon ta bati dura
Dolor di cabez
Mente ta bira confuso y por cay flow
Por cuminsa saca of haña diaree
Kico pa haci den caso di un Heatstroke ?
Busca asistencia medico mesora yama 911
Tene e persona trankil y den fresco
Los e pañanan na su curpa.
Fria e curpa cu un serbete/paña muha (cu awa friu of di cranchi)
Por pone ijs of icepack bou di brasa, na nek, lomba, riba stoma y/of memey di e pianan.
Si persona ta consciente lag’a bebe awa no mucho friu.
Na famianan di e fayecido nos ta extende nos mas sincero palabranan di condolencia.
